Futbalist pierajšoŭ u «Homiel», kab zarabić. Ale praź piać dzion jaho zvolnili — z-za majki z nadpisam F*ck Gomel

Alaksandra Anufryjeva padviało chatniaje videa, jakoje raptoŭna źjaviłasia ŭ internecie.

Alaksandr Anufryjeŭ. Skrynšot videa z sacsietak

Paŭabaronca Alaksandr Anufryjeŭ za karjeru paśpieŭ pamianiać siem kłubaŭ. Pačynaŭ jon u BATE, potym byli «Smalavičy», «Smarhoń», mazyrskaja «Słavija». Trochi pahulaŭ za «Isłač», «Minsk» i bresckaje «Dynama». A adziny trafiej 30-hadovy futbalist uziaŭ u składzie «Homiela» — vyjhraŭ z kłubam Kubak Biełarusi ŭ 2022-m.

U minułym hodzie Anufryjeŭ pierajšoŭ u BATE. U hetym siezonie jon zabiŭ try hały ŭ 14 matčach. A potym raptoŭna straciŭ matyvacyju. Akazałasia, jaho zaprasili nazad u «Homiel» i prapanavali tam zarobak, bolšy za toj, što jon atrymlivaŭ u Barysavie. U vyniku Anufryjeva adpuścili, a 1 žniŭnia jon znoŭ staŭ hulcom «rysiaŭ».

Ale zarabić nie atrymałasia. Litaralna adrazu paśla pierachodu ŭ «Homiel» u siecivie raptam źjaviłasia adno videa. Na im Anufryjeŭ u majcy z nadpisam «F*ck Gomel» i pierakulenym łahatypam kłuba.

Kali było źniata heta videa, niezrazumieła. Ale fanataŭ «Homiela» jano aburyła da hłybini dušy. Jany adrazu składali pietycyju z patrabavańniem vyhnać navička z kamandy. Anufryjeŭ pasprabavaŭ prabačacca praz sajt bel.football.

«Videa było źniata vyklučna dla asabistaha karystańnia padčas siamiejnych «pasiadziełak». Ni ŭ jakim razie nie staviŭ pierad saboj mety abrazić kaho-niebudź, začapić. I videa my tady źniali vyklučna ŭ humarystyčnych metach. Jak ja ličyŭ, dla asabistaha archiva… Ale atrymałasia tak, što jano trapiła ŭ sieciva», — skazaŭ Anufryjeŭ.

Alaksandr Anufryjeŭ. Fota: BATE

Potym jon prasiŭ prabačeńnia jašče raz, užo pierad fanatami «Homiela». Anufryjeŭ rastłumačyŭ, što nadzieŭ majku z-za projhryšu ŭ karty na žadańnie. I naohuł jaho padstavili.

«Viedajučy, što ja hulaŭ u «Homieli», i majo staŭleńnie da hetaha kłuba, čałaviek, da jakoha ciapier niama nijakaj pavahi i razumieńnia jaki, da taho ž źjaŭlajecca adnym z asnoŭnych zaŭziataraŭ BATE, skazaŭ nasić hetuju majku dzień i śpiavać pieśniu.

Ja vielmi škaduju pra toje, što heta vyliłasia ŭ takoje, i jak by čałaviek ni kryŭdziŭsia na moj sychod z BATE, hety ŭčynak vielmi nizki!

P.S. Kali ŭžo na toje pajšło, to dziŭna, čamu čałaviek tady nie skidaje videa, dzie ja kryču: je**** BATE, je****!» — adznačyŭ Anufryjeŭ, vidać, zakryŭšy sabie darohu jašče i ŭ BATE.

Na chvali skandału «Homiel» vyrašyŭ ad prablemnaha hulca pazbavicca — praź piać dzion paśla padpisańnia kantrakta.

Kamientary da artykuła