Futbalist, jakoha vyklikali ŭ zbornuju Biełarusi, zabiŭ svajho brata, taksama futbalista
Vital Aleščanka byŭ pierśpiektyŭnym napadajučym, ale sam źniščyŭ svaju karjeru — skandałami, kryminalnymi razborkami i pieradusim ałkaholem. Žyćcio pajšło pad adchon, i padzieńnie nie spyniajecca.
Imia Vitala Aleščanki dobra pamiatajuć futbolnyja zaŭziatary, jakija sačyli za čempijanatam Biełarusi ŭ samym kancy 1990-ch i pačatku 2000-ch. Talenavity forvard hulaŭ za viciebski «Łakamatyŭ-96» (ciapier — «Viciebsk») i staviŭ rekordy kłuba pa kolkaści hałoŭ.
Pikam jaho karjery byŭ 1999 hod. Aleščanka nakałaciŭ ažno 17 hałoŭ. Siarod tych, u kaho ich było bolš, byŭ Vital Kutuzaŭ — praz dva hady jaho kupiŭ «Miłan».
Zrešty, Aleščanka taksama moh źjechać za miažu. Jaho paklikali na prahlad u izrailski kłub, acanili ŭzrovień i adrazu prapanavali šykoŭny kantrakt. «Makabi» z Chajfy byŭ hatovy płacić jamu pa $9 tysiač štomiesiac i $45 tysiač startavym bonusam — šalonyja hrošy na tyja časy.
Adnak za dva dni da kančatkovaha adjezdu ŭ Izrail Aleščanka pajšoŭ na kryminalnyja razborki ŭ viciebski restaran «Bryhancina». Chtości kamuści byŭ pavinien hrošy, a futbalist vyrašyŭ uviazacca ŭ kanflikt. Słova za słova, pačałasia bojka.
«Zajšoŭ u bar, vyciahnuŭ na vulicu svajho kryŭdziciela, a tut padaśpieła padmoha z vaśmi čałaviek. Pačaŭ jaho małacić, a toj nažom zasadziŭ mnie sa śpiny. Nož ja vyciahnuŭ i pahnaŭsia za im. Natoŭp — u roznyja baki. Adčuvaju, unutranaje krovaźlićcio. Vyklikali taksi, dyk ja navat apłaciŭ za dastaŭku ŭ balnicu. Lekary skazali, što lazo prajšło ŭ dvuch milimietrach ad aorty», — raskazvaŭ futbalist u lehiendarnym intervju «Mianie ŭvodziŭ z pola AMAP»
Naturalna, paśla takich pryhodaŭ pra izrailski kantrakt možna było zabyć. U tym ža 1999-m Aleščanku navat vyklikali ŭ zbornuju Biełarusi, ale ŭ matčy z Rasijaj jon prasiadzieŭ u zapasie.
Vital pahulaŭ jašče ŭ «Homieli» i «Biełšynie», paśla viarnuŭsia ŭ rodny «Łakamatyŭ-96».
Ahułam jaho statystyka ŭ Vyšejšaj lizie šykoŭnaja — 89 matčaŭ i 36 hałoŭ.
Aleščanka davoli pozna prabiŭsia na vysoki ŭzrovień — niedzie ŭ 23 hady, — i rana skončyŭ — u 27. Siarod abstavinaŭ varta zhadać i traŭmy, ale asnoŭnaj pryčynaj, banalnaj i raspaŭsiudžanaj u tyja časy ŭ biełaruskim futbole, staŭ ałkahol.
Aleščanka pryznavaŭsia, jak za dzień da matča ŭ Vyšejšaj lizie vypivaŭ čatyry litry piva, a kali zakančvaŭ karjeru ŭ Oršy, to vychodziŭ na pole pjanym.
Małodšy brat Vitala, Juryj Aleščanka, taksama byŭ futbalistam. U pačatku 2000-ch braty razam vystupali za «Viciebsk» i «Oršu». Juryj taksama hulaŭ u napadzieńni, ale bratavych pośpiechaŭ nie dasiahnuŭ — 50 matčaŭ i 4 hały ŭ vyšejšaj lizie. Što jašče ŭ jaho było ahulnaje z bratam, dyk heta prablemy z ałkaholem.
Paśla skančeńnia karjery Vital pasprabavaŭ siabie dziciačym trenieram — nie pajšło. Tady zaniaŭsia budoŭlaj, niejki čas kataŭsia ŭ Rasiju na zarobki.
Dalej było ŭsio mienš pracy i bolš ałkaholu. Były futbalist piŭ prosta ŭ padjeździe ź siabram. Pakazalnaja historyja z taho staroha intervju:
«Darečy, za niekalki dzion da našaj sustrečy ja sčapiŭsia ź miantom. Zajšoŭ da siabroŭ, nikomu nie zaminaŭ, krychu adznačyli hetuju spravu ŭ padjeździe. Vyjšaŭ milicyjant, jaki taksama žyvie ŭ tym domie, i pačaŭ čaplacca da majho siabra. A ja ž zaŭsiody za siabroŭ haroj. Karaciej, daviałosia pabicca. U vyniku skłali pratakoł, dali troje sutak. Tolki ja ŭciok z zały suda. Znojduć — daduć 15 sutak».
Pry sustrečy ź siabrami Vital Aleščanka pieršaj spravaj prasiŭ pazyčyć hrošy — na butelku. Praź niekalki hadoŭ jaho navat adpravili ŭ ŁPP.
Darečy, u Vitala byli dźvie siamji — abiedźvie razvalilisia, i abiedźvie žonki padavali ŭ sud na alimienty. Dačka Nastaśsia taksama pajšła ŭ futboł, jana hulała ŭ kamandzie «Zorka-BDU», a ciapier stała sudździoj. Miarkujučy pa infarmacyi ŭ «Vikipiedyi», syn Jaŭhien naradziŭsia z DCP.
Što było ŭ žyćci bratoŭ Aleščankaŭ dalej? Pra heta dniami napisaŭ viciebski dziaržaŭny sajt «Vićbičy», praŭda, nie nazyvajučy ich imiony. Zrešty, pa kantekście možna lohka paznać bratoŭ:
«Kvatera [Juryja] pačała fihuravać u milicejskich dakumientach jak pryton. Dy i žadańnia žyć tam razam ź siabroŭkaj z takimi ž hłybokimi prablemami z ałkaholem asabliva nie było. Pačalisia vypadkovyja zarobki ŭ Rasii. Praŭda, usie krochi, zaroblenyja takim čynam, išli na čarhovuju butelku. A jašče ahulnaj «zabavaj» dla bratoŭ-futbalistaŭ stała rukaprykładstva nie tolki ŭ dačynieńni da maci, ale i da inšych.
«Starejšy z bratoŭ (Vital Aleščanka — NN) nieadnarazova ŭžyvaŭ hvałt u dačynieńni da maci. Pry hetym pavodziŭ siabie nachabna, ahresiŭna reahavaŭ na jaje zaŭvahi, a jana paprakała syna za toje, što toj nie pracuje. U niekatorych vypadkach patrabavaŭ hrošy na śpirtnoje, — raskazaŭ prakuror Viciebskaha rajona Ihar Lisoŭski. — Małodšy brat taksama čas ad času pahražaŭ členam siamji, ładziŭ debošy. Jon najezdami žyŭ u maci i taksama nidzie nie pracavaŭ».
31 žniŭnia 2022 hoda ŭ dom da Vitala i Juryja Aleščankaŭ pryjšła znajomaja, pačałasia čarhovaja pjanka. U niejki momant pamiž bratami pačałasia sprečka, a paśla i bojka. Vital schapiŭsia za nož i zabiŭ svajho 37-hadovaha brata.
U sudzie Vital častkova pryznaŭ vinu. Jamu pryznačyli 9 hadoŭ kałonii va ŭmovach uzmocnienaha režymu.
Vialikaja hutarka z Franakam Viačorkam — pra kruhły stoł z Łukašenkam, pamyłki, chejtaraŭ i hałoŭnaje dasiahnieńnie26
Kamientary
vam škała miaḱkich znakaú ?