Kavuny, bujaki i «Karaleva Hanna» pa rublu za kiło. Dzie tańniej kupić harodninu i jahady?

Užo blizkaja vosień doryć biełarusam sadavinna-aharodninnaje bahaćcie. I kali sadoŭnickija ekśpierymienty na asabistych učastkach sapsavała nadvorje, to ŭradžaj na rynkach i ŭ kramach stabilna bahaty. Žurnalisty vydańnia Myfin.by vyśvietlili, dzie bolš vyhadna napoŭnić vitaminny košyk.

Tut i dalej fota Julii Škućko / Myfin.by

U jakaści ekśpierymientu žurnalisty adpravilisia na rynak «Novy Lebiadziny», a ceny na papularnyja pazicyi paraŭnali z cenami harodniny i sadaviny ŭ handlovaj sietcy. U vyniku vyśvietlili, dzie samyja pryvabnyja ceny i jakija jahady ciapier na vahu zołata.

I ŭrazdrob, i optam

Rynak «Novy Lebiadziny» ŭ vioscy Tabary raźmiaściŭsia za 5 kiłamietraŭ ad Minska pa hrodzienskaj trasie. Handlovyja rady pracujuć štodnia, a raznastajny asartymient i pryjemnyja ceny kampiensujuć źlohku addalenaje ad horada miescaznachodžańnie.

Jašče hetaje miesca dazvalaje napoŭnicu złavić prystup nastalhii pa «zakupach» u Ždanovičach. Rytm šopinhu zadaje bajanist, pierakusić prapanujuć kukuruzaj «jak na mory», adrazu ŭ niekalkich miescach pradajuć kvas z bočki. Pry hetym rynak vyrazna strukturavany, a ad daždžu praduhledžanyja nadziejnyja naviesy.

Siezonnyja harodnina i sadavina znachodziacca adrazu na čatyroch radach: A, B, V i H. Navat u budni ŭ Tabarach nie nazirajecca niedachopu pakupnikoŭ. Biełarusy pryjazdžajuć zapaścisia harodninaj dla kansiervacyi i sadavinaj na tydzień.

Cana tavaraŭ paznačanaja za kiłahram, ale čaściakom jość dadatkovyja paznaki, naprykład «tolki opt». Heta značyć, što kupić kiło piersikaŭ nie atrymajecca — addaduć tolki skryniu. Takaja ž situacyja z bulbaj, burakami i cybulaj. Tak što kali vy chacieli nabyć niekalki apielsinaŭ i limon da čaju, to jechać u «Novy Lebiadziny» — lišniaja strata času.

Pry hetym niekatoryja pradaŭcy achvotna pradajuć ŭvieś asartymient i ŭrazdrob. Taksama amal u kožnym paviljonie ŭstalavany terminał dla apłaty.

Artyšoki, marmieładnyja dyni i, viadoma, bulba

Na rynku možna znajści navat vynachodki francuzskaj kuchni. Za adzin artyšok pryjdziecca zapłacić 20 rubloŭ, u takuju ž canu abyjdziecca cybula-parej.

Minimalny ceńnik na biełaruskuju bulbu sortu «Karaleva Hanna» startuje ad 1 rubla za kiłahram. Maksimum za «druhi chleb» biełarusaŭ prosiać 1,60. Cybula kaštuje krychu tańniej — 1,30. Morkva — ad 90 kapiejek.

Samy vialiki dyjapazon cenaŭ i asartymient u tamataŭ: malinavyja, čery, žoŭtyja i śliŭki — ad 1,50 da 3 rubloŭ za kiło. Bakłažan u roźnicu addajuć pa 4 rubli za kiłahram, a optam na 50 kapiejek tańniej. Kabački ŭžo pa 1,50, a ahurki jość na luby biudžet: ad 2,70 za nieetałonnyja ekzemplary da 7,50 za siarednija z kalučkami. Pierac, žoŭty i čyrvony, u adnu canu — 6,50. Brokali kaštuje 12 rubloŭ za kiłahram.

Pierš čym niešta kupić, lepš vyvučyć ceny adrazu ŭ niekalkich pradaŭcoŭ. Naprykład, ślivy možna kupić za 5 rubloŭ, 6,90 i navat za 7,50. Piersik «Parahvaj» taksama pradstaŭleny ŭ troch cenavych katehoryjach — 7,50, 9 rubloŭ i 10.

Apielsiny prapanujuć za 5 i 6 rubloŭ, mandaryny — 6 i 7 rubloŭ. Niektaryny možna adšukać za 8 rubloŭ, samy vysoki ceńnik — 11,50. Piersiki pradajuć ad 6,50 za kiło da 12,50.

Abrykosy z Turcyi možna nabyć usiaho za 4,50. Dyni i kavuny — pa 2 rubli za kiłahram.

Bujnyja bujaki z Bresta — 17 rubloŭ za kiłahram, drobnyja možna kupić navat za 14,99, pry hetym u smaku jany nie sastupajuć.

Adbornyja ažyny kaštujuć 18 rubloŭ za 1 kiłahram, a maliny — 30 rubloŭ.

Na rynku achvotna dajuć kaštavać pradukcyju, darečny i razumny torh.

Što pa kolki ŭ hipiermarkiecie

Sietka «Jeŭraopt» ličycca dastupnaj pa cenavaj palitycy dla vialikaha koła pakupnikoŭ. Za vyhadnymi tavarami ŭ bujnyja hipiermarkiety jeduć z usiaho horada. Pa piatnicach i napiaredadni śviataŭ na pryłaŭkach krasujucca «čyrvonyja» ceńniki, jakija abiacajuć źnižki.

Sadavinna-aharodninny adździeł u handlovaj sietcy napoŭnieny i ekzatyčnymi tavarami. U apošni čas nazirajecca bahaćcie pładoŭ z Azii. Naprykład, možna kupić ličy, pitachaju, ci «drakonaŭ frukt», kakosy z trubačkaj i manha.

Zvykłyja dla biełarusaŭ sadavina i harodnina taksama ŭ najaŭnaści. Praŭda, nie zaŭsiody jany majuć pryvabny vyhlad, čaściakom možna pabačyć niaśpiełyja piersiki ci zalažałyja limony.

Bulba ŭradžaju hetaha hoda ŭ hipiermarkiecie kaštuje 1,29 rubloŭ za 1 kiłahram. Maładuju morkvu taksama možna kupić pa vyhadnaj canie — 91 kapiejka za kiło.

Košt piercu varjirujecca ŭ zaležnaści ad jaho koleru: zialony hruntavy kaštuje tańniej za astatnija — mienš za 3 rubli, čyrvony — 7,79, a žoŭty — 9,56.

Tamaty pa-raniejšamu trymajuć ceńnik vyšej za 5 rubloŭ, pry hetym jany nie takija duchmianyja, jak na rynku. Kiłahram ahurkoŭ abyjdziecca ŭ 4,49.

Kavuny i dyni čaściej za ŭsio vialikaha pamieru, viadoma, kupić ich atrymajecca tolki całkam. Dynia sortu «Krasnamiaska» kaštuje 3,79 za 1 kiłahram, «Tarpieda» — 3,99. Za kiłahram kavuna pryjdziecca addać 1,49.

Avakada možna adšukać na źnižcy, za dva frukty ŭ kantejniery — 8,99, kiłahram avakada — 14,99.

Paraŭnańnie cenaŭ

Nakolki «sałodkija» ceny ŭ Tabarach i ci surjoznaja pierapłata ŭ adnym z samych dastupnych biełaruskich hipiermarkietaŭ? Supastaŭnyja ceny tavaraŭ na rynku i ŭ «Jeŭraopcie». U tablicy ceny paznačanyja ŭ rublach za 1 kiłahram.

Jak my bačym, harodnina, jakaja ŭvachodzić u «barščavy nabor», adroźnivajecca pa canie niaznačna. A voś inšyja tavary, pradstaŭlenyja na rynku, tańniejšyja u dva, a to i ŭ try razy. Samaja cikavaja situacyja ź jahadami: ažyny z kramy vyjduć daražej amal u 4,5 razu, čym na rynku.

Kamientary da artykuła