NATA rychtuje vajenny adkaz na ataku rasijskich dronaŭ u Polščy

NATA rychtuje «abarončy vajenny adkaz» paśla ŭvarvańnia rasijskich bieśpiłotnikaŭ u pavietranuju prastoru Polščy. Mety hetaha adkazu — uzmacnić zdolnaść sił aljansu da strymańnia na ŭschodnim fłanhu, paviedamlaje Bloomberg.

Fota: AP Photo/Geert Vanden Wijngaert

Kaardynavać dziejańni budzie hałoŭnakamandujučy Abjadnanymi ŭzbrojenymi siłami NATA ŭ Jeŭropie hienierał Aleksus Hrynkievič, jaki adkazvaje za płanavańnie i praviadzieńnie ŭsich apieracyj aljansu. Ciapier jahony štab analizuje situacyju i vyznačaje nieabchodnyja pastaŭki dla ŭmacavańnia patencyjału abarony.

Hrynkievič adznačyŭ, što krainy ŭžo ŭdaskanalvajuć uzbrajeńnie, kab źnizić vydatki na viadzieńnie bajavych dziejańniaŭ, i NATA budzie praciahvać kaardynacyju z usimi dziaržavami-členami. Jon taksama zajaviŭ, što aljans zrobić vysnovy z hetaha incydentu i acenić, što treba palepšyć dla supraćdziejańnia padobnym «abmiežavanym uvarvańniam».

Polšča ŭ adkaz na hetu ataku pierakinuła 40 tysiač vajskoŭcaŭ da miežaŭ ź Biełaruśsiu i Rasijaj, a taksama źviarnułasia da sajuźnikaŭ z prośbaj dać joj dadatkovyja sistemy SPA i technałohii dla baraćby z dronami. Niekatoryja krainy, u tym liku Hiermanija, Niderłandy, Čechija, Francyja i Vialikabrytanija, vykazali hatoŭnaść uzmacnić padtrymku.

Francyja i Vialikabrytanija płanujuć nakiravać u Polšču źniščalniki Rafale i Eurofighter, Niderłandy — dva kompleksy SPA Patriot. Hiermanija paabiacała pašyryć patrulavańnie pavietranaj prastory nad Polščaj i padrychtavać novy pakiet sankcyj suprać Rasii. Prezident Francyi Emanuel Makron taksama paviedamiŭ, što Francyja zadziejničaje try źniščalniki Rafale dla abarony pavietranaha prastoru Polščy i ŭschodniaha fłanhu Jeŭropy.

Incydent adbyŭsia nočču 10 vieraśnia: jak minimum 19 rasijskich dronaŭ parušyli miažu Polščy padčas masiravanaha abstrełu Ukrainy. Dla ich pierachopu ŭpieršyniu z pačatku vajny byli padniatyja samaloty NATA. Piać bieśpiłotnikaŭ upali na terytoryju Lublinskaha vajavodstva, adzin paškodziŭ žyły dom. Premjer-ministr Polščy Donald Tusk zajaviŭ, što kraina ciapier «najbližej da vajennaha kanfliktu, čym kali-niebudź z časoŭ Druhoj suśvietnaj vajny».

Kamientary da artykuła