ZŠA paabiacali abaraniać «kožny dziujm» terytoryi NATA

ZŠA paabiacali abaraniać terytoryju svaich sajuźnikaŭ pa NATA paśla taho, jak u noč z 9 na 10 vieraśnia na terytoryju Polščy zalacieli rasijskija bieśpiłotniki. Pra heta zajaviła časovaja pastajannaja pradstaŭnica ZŠA pry AAN Doraci Šy padčas pasiadžeńnia Rady biaśpieki.

Zdymak ilustracyjny. Fota: AP Photo / Evgeniy Maloletka

Doraci Šy padkreśliła, što Vašynhton padtrymlivaje sajuźnikaŭ i ŭžo viadzie kansultacyi z Polščaj i inšymi krainami pavodle artykuła 4 Paŭnočnaatłantyčnaj damovy

«Złučanyja Štaty padtrymlivajuć našych sajuźnikaŭ pa NATA pierad abliččam hetych tryvožnych parušeńniaŭ pavietranaj prastory. ZŠA kansultujucca z Polščaj i inšymi sajuźnikami ŭ NATA ŭ adpaviednaści z artykułam 4 Paŭnočnaatłantyčnaj damovy, i budźcie ŭpeŭnienyja, my abaronim kožny dziujm terytoryi NATA», — skazała jana.

U zajavie Šy adkryta adznačajecca, što ŭ minułuju sieradu na terytoryju Polščy zalacieli mienavita rasijskija vajskovyja bieśpiłotniki. Pavodle jaje słoŭ, takija dziejańni, navat kali jany byli nienaŭmysnymi, «demanstrujuć vielizarnuju niepavahu da dobrasumlennych namahańniaŭ ZŠA pa zaviaršeńni hetaha kanfliktu».

Rasijski pradstaŭnik pry AAN Vasilij Niabienzia adchiliŭ abvinavačańni. Jon zajaviŭ, što ŭ tuju noč Rasija atakavała bieśpiłotnikami tolki vajskovyja abjekty va Ukrainie i nie mieła nijakich celaŭ na terytoryi Polščy. Pavodle jaho, dalokaść palotu vykarystanych dronaŭ — nie bolš za 700 kiłamietraŭ, tamu trapić u Polšču jany, maŭlaŭ, «fizična nie mahli».

Prezident ZŠA Donald Tramp raniej taksama adreahavaŭ na siutacyju, adznačyŭšy, što niezadavoleny situacyjaj. Jon dapuściŭ, što incydent moh być pamyłkaj, ale zajaviŭ, što ŭsio adno maje namier asudzić Rasiju, jakaja «zanadta blizka padyšła da hetaj linii».

Pavodle polskich uładaŭ, u tuju noč, kali Rasija pravodziła masiravanyja ŭdary pa Ukrainie, u pavietranaj prastory Polščy było zafiksavana nie mienš za 19 bieśpiłotnikaŭ. Dla ich pierachopu, akramia polskaj avijacyi, upieršyniu z pačatku vajny padnialisia i źniščalniki NATA. Paźniej na terytoryi krainy znajšli abłomki 17 dronaŭ.

Na hetym fonie Varšava aktyvavała artykuł 4 Statuta NATA, jaki praduhledžvaje kansultacyi pamiž členami aljansu ŭ vypadku pahrozy terytaryjalnaj cełasnaści, niezaležnaści ci biaśpiecy krainy.

Kamientary da artykuła