U Litvie zatrymali hrupu ludziej, jakija abvinavačvajucca ŭ arhanizacyi padpałaŭ i vybuchaŭ u Jeŭropie

U Litvie Hienieralnaja prakuratura razam ź Biuro kryminalnaj palicyi paviedamili pra zatrymańnie hrupy asob, jakich padazrajuć u arhanizacyi vybuchaŭ i padpałaŭ u roznych krainach Jeŭropy. Pavodle śledstva, za hetymi złačynstvami stajali ludzi, jakija majuć suviazi z rasijskaj vajskovaj raźviedkaj.

Fota: Hienieralnaja prakuratura Litvy

Asnoŭnym fihurantam spravy staŭ hramadzianin Litvy A. Š., 1973 hoda naradžeńnia. Jaho abvinavačvajuć u tym, što jon adpraŭlaŭ za miažu pasyłki z samarobnymi vybuchovymi pryładami praź mižnarodnyja słužby dastaŭki DHL i DPD. Usiaho jon nibyta vysyłaŭ čatyry takija pasyłki:

• pieršaja była adpraŭlenaja 20 lipienia 2024 hoda i vybuchnuła ŭ Hiermanii na terminale DHL pierad pahruzkaj u samalot pa maršrucie Vilnia — Lajpcyh —— Vialikabrytanija;
• druhaja zdetanavała 21 lipienia ŭ hruzaviku DPD, jaki jechaŭ pa terytoryi Polščy;
• treciaja vybuchnuła 22 lipienia na składzie DHL u Birminhiemie (Vialikabrytanija);
• čaćviortaja nie spracavała praź niaspraŭnaść miechanizma.

Pavodle infarmacyi prakuratury, vybuchovyja pryłady byli zamaskavanyja pad masažnyja paduški, dzie ŭstaloŭvalisia elektronnyja tajmiery. Dadatkovyja haručyja rečyvy chavalisia ŭ kaśmietyčnych i hihijeničnych tubach.

Śledstva miarkuje, što A. Š. dziejničaŭ nie adzin. Usiaho vystaŭlenyja abvinavačańni 15 asobam — hramadzianam Litvy, Rasii, Łatvii, Estonii i Ukrainy. Kaardynacyja i arhanizacyja dyviersij, pavodle aficyjnych danych, adbyvałasia z boku rasijskich hramadzian, źviazanych z raźviedvalnymi strukturami.

Asobna padkreślivajecca, što niekatoryja ŭdzielniki hetaj sietki datyčnyja da padpału handlovaha centra IKEA u Vilni 9 maja 2024 hoda. Da hetaj spravy spryčynilisia: hramadzianin Ukrainy Daniił Hromaŭ (1988 h. n.), hramadzianin Litvy i Rasii Tomaš Doŭhań Stabačynskas (1971 h.n.), a taksama hramadzianin Rasii Andrej Baburaŭ (1962 h. n.). Usie troje abvieščanyja ŭ mižnarodny vyšuk.

Daniił Hromaŭ (Jarasłaŭ Michajłaŭ), Tomaš Doŭhań Stabačynskas i Andrej Baburaŭ. Fota: Hienieralnaja prakuratura Litvy

Rasśledavańnie viadziecca nie tolki ŭ Litvie: u jaho ŭklučanyja pravaachoŭnyja i raźviedvalnyja orhany Polščy, Vialikabrytanii, Hiermanii, Niderłandaŭ, Łatvii, Estonii, ZŠA i Kanady. Kryminalnaja sprava viadziecca pa artykułach ab dziejnaści arhanizavanaj terarystyčnaj hrupy i ździajśnieńni terarystyčnych aktaŭ.

Heta nie pieršy padobny incydent. U kastryčniku 2024 hoda polskaja prakuratura ŭžo paviedamlała pra zatrymańnie čatyroch čałaviek u suviazi z vybuchovymi pasyłkami i padpałami ŭ Polščy, Hiermanii i Vialikabrytanii. Zachodnija ŚMI, u tym liku Wall Street Journal, pisali, što heta mahli być «testavyja dyviersii», arhanizavanyja rasijskimi śpiecsłužbami. U Polščy navat zajavili, što metaj hrupy było adpracoŭvańnie kanałaŭ pierasyłki, kab u budučyni dasyłać padobnyja pasyłki ŭ ZŠA i Kanadu.

Akramia taho, litoŭskaja prakuratura jašče ŭ sakaviku 2025 hoda abvinavaciła rasijskuju raźviedku ŭ arhanizacyi pažaru ŭ IKEA ŭ Vilni. Tady ŭ spravie fihuravali dva hramadzianiny Ukrainy, adzin ź jakich byŭ niepaŭnaletni. Pavodle The New York Times, 17‑hadovy chłopiec z Chiersona atrymaŭ abiacańnie ŭznaharody ŭ 11 tysiač dołaraŭ i aŭtamabil BMW za ŭdzieł u padpale.

Aficyjnaja Maskva ŭsie abvinavačańni adkidaje. Pres-sakratarka MZS Rasii Maryja Zacharava nazvała ich «biespadstaŭnymi» i «pradyktavanymi rusafobijaj».

Kamientary da artykuła