Biełarusu vystavili abvinavačańnie ŭ padpale hipiermarkieta ŭ Varšavie pa zadańni rasijskich śpiecsłužbaŭ

Jak paviedamili ŭ prakuratury, pažar adbyŭsia 14 krasavika 2024 hoda, zhareła častka kramy, škoda aceńvajecca ŭ sumu bolš za 3,5 miljona złotych (pryblizna 900 tysiač dalaraŭ pa biahučym kursie). Havorka idzie pra pažar u HC OBI na vulicy Radzyminskaj.

Pavodle viersii abvinavačańnia, hramadzianin Biełarusi 13 krasavika raźliŭ u kramie lohkaŭzharalnuju vadkaść i pakinuŭ prystasavańni dla dystancyjnaha padpału. Unačy na 14 krasavika jany spracavali, i pačaŭsia pažar. Taksama Ściapan K. zdymaŭ pažar na telefon, a paźniej častka hetych materyjałaŭ «była apublikavanaja na rasijskich prapahandysckich sajtach».

«Akramia taho, ustanoŭlena, što padazravany Ściapan K. ździejśniŭ nazvany padpał, dziejničajučy ŭ intaresach zamiežnaj raźviedki, a mienavita raźviedki Rasijskaj Fiederacyi, i pa zadańni rasijskich śpiecsłužbaŭ», — dadali ŭ prakuratury.

Mužčynu pradjaŭleny abvinavačańni ŭ ździajśnieńni dyviersii ŭ intaresach zamiežnaj raźviedki i terarystyčnym złačynstvie (art. 130 i p. 1 art. 165 Kryminalnaha kodeksa Polščy). Pavodle hetych artykułaŭ praduhledžana pakarańnie terminam ad 10 hadoŭ da pažyćciovaha źniavoleńnia.

«Paśla vystaŭleńnia abvinavačańnia Ściapanu K. jaho dapytali ŭ jakaści padazravanaha. Na hety momant my nie dajem nijakaj infarmacyi pra jaho pracesualny status», — havorycca ŭ paviedamleńni.

Sud vyrašyŭ pakinuć jaho pad aryštam jašče na try miesiacy. Jon užo znachodzicca pad vartaj. U prakuratury patłumačyli, što mužčyna źjaŭlajecca fihurantam rasśledavańnia ŭ spravie arhanizavanaj złačynnaj hrupy, jakaja zajmajecca viarboŭkaj i arhanizacyjaj dyviersijnaj dziejnaści ŭ intaresach zamiežnaj raźviedki. Jamu taksama pradjaŭleny abvinavačańni pa hetaj spravie pavodle artykułaŭ ab špijanažy i ŭdziele ŭ arhanizavanaj złačynnaj hrupie.

Prakuratura dadała, što praciahvajecca rasśledavańnie padpałaŭ inšych bujnych kram u Polščy i krainach Centralnaj i Uschodniaj Jeŭropy, uklučajučy Litvu. Śledstva viadziecca, u tym liku, u ramkach sumiesnaj śledčaj hrupy ź litoŭskimi pravaachoŭnymi orhanami.

U minułym hodzie polskija pravaachoŭnyja orhany nieadnarazova zajaŭlali pra zatrymańnie asob, datyčnych da pracy na rasijskuju raźviedku, a taksama da bujnych pažaraŭ, jakija adbylisia ŭ Varšavie, Urocłavie, Hdańsku i inšych miescach. U pryvatnaści, u mai minułaha hoda Ahienctva ŭnutranaj biaśpieki (ABW) paviedamlała pra praviadzieńnie śledčych dziejańniaŭ, źviazanych z pažarami. Pavodle źviestak ŚMI, havorka tady mahła iści pra hramadzian Biełarusi.

Treba adznačyć, što ŭ siońniašnich paviedamleńniach palicyi i prakuratury nie ŭdakładniajecca, kali, dzie i pry jakich abstavinach byŭ zatrymany Ściapan K.

• 4
• 0
• 0
• 3
• 0
• 0
• 4
• 0