U Tajłandzie skasavali abmiežavańnie na prodaž ałkaholu z bolš čym 50‑hadovaj historyjaj
U Tajłandzie dazvolili pradavać ałkahol u dzionny čas. Paśla publikacyi adpaviednaj pastanovy ŭ miascovaj «Karaleŭskaj haziecie» zabarona, jakaja dziejničała z pačatku 1970-ch, straciła moc.
Zdymak ilustracyjny. Fota: «Naša Niva»
Ciapier u krainie dazvolena pradavać śpirtnoje z 14:00 da 17:00. Heta zroblena ŭ testavym režymie na paŭhoda: paśla ŭłady daduć acenku ekanamičnych i sacyjalnych nastupstvaŭ i vyznačać, ci praciahvać pasłableńnie. Pry hetym zabarona na prodaž ałkaholu z paŭnočy da 11:00 zastajecca.
Dla baraŭ i restaranaŭ zroblenaje vyklučeńnie — ich naviedvalniki zmohuć užyvać ałkahol jašče hadzinu paśla zaviaršeńnia prodažu, da 01:00. Abmiežavańni taksama nie dziejničajuć u mižnarodnych aeraportach dla pasažyraŭ na vylet i prylot, a taksama ŭ licenzavanych zabaŭlalnych ustanovach i častcy hatelaŭ.
Abmiežavańni na prodaž ałkaholu ŭ Tajłandzie isnavali z 1972 hoda, kali ich uviali, kab praduchilić užyvańnie śpirtnoha na pracy ŭ pracoŭny čas. Pytańnie adnosna admieny hetych praviłaŭ padniali pradstaŭniki restarannaha biźniesu, jakija ŭ 2024 hodzie źviarnulisia da tahačasnaha premjer-ministra Sietchi Tchavisina, skardziačysia na rost vydatkaŭ i cenaŭ na pradukty.
Ułady čakajuć, što źmiakčeńnie hetych praviłaŭ padtrymaje ekanomiku i zrobić krainu jašče bolš pryvabnaj dla turystaŭ.
Čytajcie taksama:
Krainy Paŭdniova-Uschodniaj Azii mocna cierpiać ad razburalnych pavodak
U Tajłandzie žančynu pryvieźli na kremacyju, a jana ŭziała i ažyła
U Tajłandzie źnik biełaruski mastak
Biełarusku z redkaj hrupaj kryvi, što trapiła ŭ DTZ u Tajłandzie, vyratavała žycharka Kryma