«Śviaciła vosiem hadoŭ». Biełarus sa Ščučynščyny raskazaŭ, jak pajšoŭ vajavać za Rasiju

Va Ukrainie ŭ pałon trapiŭ 40‑hadovy ŭradženiec Ščučynskaha rajona Rusłan Hudač, jaki vajavaŭ u składzie rasijskaj armii. Videa ź im źjaviłasia ŭ telehram-kanale «Dožduś tiebia», zaŭvažyła Hrodna.life.

Rusłan Hudač. Fota: t.me/I_am_will_wait

Pavodle infarmacyi kanała, Hudač rodam ź vioski Hanielki Ščučynskaha rajona. U videa jon raskazvaje, što da słužby sprabavaŭ zajmacca biznesam, ale paciarpieŭ niaŭdaču. Da jaho ŭźnikli pretenzii z nahody niedapłaty padatkaŭ, za što jamu «śviaciła vosiem hadoŭ».

Pa słovach Hudača, u rasijskich siłavych strukturach jamu prapanavali zapluščyć na heta vočy, kali pahodzicca iści na vajnu z Ukrainaj.

Biełarus sprabavaŭ praz svajho znajomaha ŭładkavacca na «tyłavuju pasadu», ale jaho nakiravali ŭ šturmavyja čaści.

Mužčyna kaža, što jaho padmanuli, i dadaje, što da apošniaha nie było zrazumieła, kudy jon trapić.

Taksama jon adznačaje, što nijakija zadačy pierad im nie stavilisia da apošniaha momantu i «dakładnaje vykanańnie było nikomu nieviadoma».

Hudač trapiŭ u pałon USU na terytoryi Kurskaj vobłaści. Jon kaža, što dva miesiacy chavaŭsia ŭ padvałach, pierš čym byŭ zachopleny. Pavodle jaho słoŭ, na palihonie «Pastajałyja Dvary» ich amal ničomu nie vučyli.

«Paŭnočnyja karejcy, jakija byli ŭ łahiery, mieli bolš vysoki ŭzrovień padrychtoŭki. Nam ź imi kateharyčna zabaraniałasia razmaŭlać», — kaža jon.

Pavodle raskazu Hudača, padčas apieracyi ŭ Ciotkinie (pasiołak u Hłuškoŭskim rajonie kala miažy Rasii i Ukrainy) jahonaja hrupa paniesła vialikija straty: «Da punktaŭ dajšli nie ŭsie, mnohija zahinuli, ja — paranieny».

Kamientary da artykuła