Na froncie zahinuŭ syn eks-kandydata ŭ prezidenty Dźmitryja Usa. Ivan vajavaŭ za Rasiju
Ivan Us niekali ŭznačalvaŭ ruch «Antymajdan Minsk», u 2020‑m adsiedzieŭ na sutkach za ŭdzieł u pratestach suprać Alaksandra Łukašenki, a ŭ 2025‑m pajechaŭ vajavać za Rasiju. Na froncie jon pratrymaŭsia vobmal času.
«Našaj Nivie» stała viadoma pra hibiel na froncie 28‑hadovaha biełarusa Ivana Usa. Jon pajšoŭ vajavać za Rasiju va Ukrainie u pačatku 2025 hoda.
Heta syn Dźmitryja Usa — vypadkovaha i ŭ čymści navat trahikamičnaha kandydata ŭ prezidenty — 2010, jaki tym nie mienš za ŭdzieł u vybarach trapiŭ u kałoniju.
Ivan Us u siaredzinie 2010‑ch byŭ administrataram prarasijskaj supołki «Antymajdan Minsk» u sacyjalnaj sietcy «UKantakcie».
U 2020‑m Us-małodšy dałučyŭsia da pratestaŭ suprać Alaksandra Łukašenki i navat trapiŭ na 15 sutak za ŭdzieł u maršy 16 žniŭnia.
17 studzienia 2025 hoda Ivan Us padpisaŭ kantrakt z rasijskaj armijaj. Tady i pajšoŭ adlik jaho apošnich dzion. Nam dakładna nieviadomaja data śmierci syna kandydata ŭ prezidenty, ale jon zahinuŭ prykładna ŭ kancy zimy ci samym pačatku viasny.
Dźmitryj Us — biznesmien, ułaśnik kartahrafičnaha biznesu. Tam, darečy, pracavaŭ i jaho syn.
Na prezidenckich vybarach — 2010 Us vyrašyŭ dapamahčy sabrać podpisy Mikołu Statkieviču, ale zaadno źbiraŭ podpisy i za siabie. Ich kolkaść była vidavočna mizernaj, ale ŭ tuju kampaniju Alaksandr Łukašenka vyrašyŭ zarehistravać kandydatami ŭsich achvotnych. Tak u biuleteni patrapiŭ i Us, jaki navat nie moh vieści paŭnavartasnuju ahitacyjnuju kampaniju — praz nastupstvy insultu jon ledź razmaŭlaŭ.
Lidzija Jarmošyna zajaviła, što na vybarach za jaho prahałasavali 25 tysiač čałaviek (mienš za 0,4%).
Adnak heta nie ŭratavała Usa ad paślavybarčych represij. Jaho aryštavali, na niejki čas adpuścili dadomu, ale ŭrešcie ŭsio adno prysudzili piać z pałovaj hadoŭ źniavoleńnia. Eks-kandydata ŭtrymlivali ŭ škłoŭskaj kałonii. Praź piać miesiacaŭ Us vyjšaŭ na svabodu pa pamiłavańni.
-
Udzielnik čelendžu Mełstroja pryciahnuŭ na nabiarežnuju ŭ Homieli aŭtamat z cackami i ŭźlez na jaho. Im zacikavilisia siłaviki
-
U Minsku zapuściać antynarkamanski aŭtobus. Pasažyraŭ buduć supravadžać siłaviki
-
Što rabić, kali miažu znoŭ raptam zakryjuć? Biełarusy abmiarkoŭvajuć, jak płanavać pajezdku ŭ novych realijach
Ciapier čytajuć
Čamu palihraf — nie panaceja. Kolki ahientaŭ jon by vyjaviŭ u Kaardynacyjnaj radzie?11
Kamientary