Deputatu ad AdH pakinuli ŭ sile štraf 20 tysiač jeŭra za fiermu z cybulaj u Biełarusi
Administracyjny sud Lejpcyha pastanaviŭ, što rašeńnie ab štrafie deputatu parłamienta ziamli Saksonija ad ultrapravaj partyi «Alternatyva dla Hiermanii» Jorhu Dornau za ŭtojvańnie biznesu ŭ Biełarusi było zakonnym, piša DW Biełaruś sa spasyłkaj na AFP.
Jorh Dornau
Pieršapačatkova štraf 20 862 jeŭra byŭ nakładzieny na Dornau parłamientam ziamli ŭ žniŭni 2024 hoda za toje, što jon u vyznačany zakonam termin nie paviedamiŭ uładam pra toje, što vałodaje dolaj pradpryjemstva ŭ vyroščvańni cybuli «Cybulka-Bieł» pad Lidaj i byŭ jaho dyrektaram. Deputat abskardziŭ rašeńnie, śćviardžajučy, što nie byŭ abaviazany paviedamlać pra fiermu, a štraf zanadta vialiki.
Ciapier Dornau moža abskardzić adchileńnie svajoj apielacyi ŭ Vyšejšym administracyjnym sudzie Saksonii.
Da pracy na fiermie na damoŭlenaść z Centram izalacyi pravaparušalnikaŭ pryciahvali i asudžanych biełarusaŭ, u tym liku pavodle palityčnych artykułaŭ, i Dornau pra heta viedaŭ. Prakuratura Lejpcyha ŭ śniežni 2024 hoda ź jurydyčnych pryčynaŭ admoviłasia ad pačatku rasśledavańnia ŭ dačynieńni Dornau.