Pamianiali paradak ilhotnaha zabieśpiačeńnia ludziej lekami

Premjer-ministr Biełarusi Alaksandr Turčyn padpisaŭ pastanovu Savieta Ministraŭ «Ab ilhotnym zabieśpiačeńni lekavymi srodkami i pieraviazačnymi materyjałami», paviedamlaje pres-słužba ŭrada.

Zdymak ilustracyjny. Fota: «Naša Niva»

Dakumient, jak zajaŭlajecca, skiravany na palapšeńnie sistemy ilhotnaha zabieśpiačeńnia lekami, a taksama na ŭzmacnieńnie sacyjalnaj padtrymki asobnych katehoryj hramadzian, jakija pakutujuć ad ciažkich chraničnych zachvorvańniaŭ.

Pastanovaj zaćvierdžana Pałažeńnie ab paradku biaspłatnaha i ilhotnaha zabieśpiačeńnia lekavymi srodkami i pieraviazačnymi materyjałami. Taksama vyznačany pieralik zachvorvańniaŭ, jakija dajuć prava na biaspłatnaje atrymańnie lekaŭ pa receptach daktaroŭ (u miežach pieraliku asnoŭnych lekavych srodkaŭ) pry ambułatornym lačeńni, a taksama na lačebnaje charčavańnie.

Asnoŭnyja źmieny:

• ustanoŭlenaja dakładnaja pieryjadyčnaść atrymańnia lekaŭ u aptekach pry pryznačeńni ich na praciahły kurs lačeńnia — da šaści miesiacaŭ;
• pašyranaja mahčymaść atrymańnia lhotnych lekaŭ u miežach rajona i vobłaści, a nie tolki pa miescy vypisvańnia receptu, jak było raniej;
• pavialičanyja paŭnamoctvy i abaviazki miedycynskich rabotnikaŭ u zabieśpiačeńni lhotnymi lekami žycharoŭ sielskich nasielenych punktaŭ, dzie niama aptek (da hetaha času tam pradavalisia leki tolki za poŭny košt);
• dziejny pieralik zachvorvańniaŭ dla lhotnaha lekavaha zabieśpiačeńnia pry ambułatornym lačeńni dapoŭnieny 12 novymi pazicyjami, u tym liku redkimi hienietyčnymi i chraničnymi sistemnymi chvarobami;
• dla šerahu zachvorvańniaŭ, jakija ŭžo byli ŭ pieraliku, admienienyja ŭzrostavyja abmiežavańni na atrymańnie lhotnych lekaŭ.

Pastanova pačnie dziejničać praz try miesiacy paśla jaje aficyjnaha apublikavańnia.

Kamientary da artykuła