Zialenski, Makron i Starmier padpisali dekłaracyju ab razhortvańni va Ukrainie zamiežnaha kantynhientu

Prezident Ukrainy Uładzimir Zialenski, prezident Francyi Emanuel Makron i premjer-ministr Vialikabrytanii Kir Starmier padpisali dekłaracyju ab namierach razharnuć u Ukrainie paśla zakančeńnia vajny šmatnacyjanalny vajskovy kantynhient. Pra heta stała viadoma paśla sustrečy tak zvanaj «kaalicyi achvotnych».

Padčas padpisańnia dakumienta. Skrynšot ź videa

Emanuel Makron paviedamiŭ, što ŭdzielniki samitu damovilisia pra miechanizmy kantrolu za vykanańniem režymu spynieńnia ahniu, i padkreśliŭ, što klučavuju rolu ŭ hetym buduć adyhryvać Złučanyja Štaty Amieryki.

Jon taksama adznačyŭ, što asnoŭnaj siłaj strymlivańnia rasijskaj ahresii zastanucca Uzbrojenyja siły Ukrainy. Pavodle jaho słoŭ, paśla spynieńnia ahniu ŭkrainskaja armija budzie naličvać kala 800 tysiač vajskoŭcaŭ, a zachodnija partniory abaviazalisia akazvać joj padtrymku.

Makron dadaŭ, što zamiežnyja siły z krain «kaalicyi achvotnych» płanujecca raźmiaścić na sušy, u pavietry i na mory, kab zabiaśpiečyć vykanańnie damoŭlenaściaŭ ab spynieńni ahniu.

U svaju čarhu Uładzimir Zialenski zajaviŭ, što dakumienty, jakija tyčacca harantyj biaśpieki dla Ukrainy, užo padrychtavanyja i buduć padpisanyja ŭ najbližejšy čas.

Raniej paviedamlałasia, što ŭ vypadku spynieńnia ahniu kolkaść zamiežnaha miratvorčaha kantynhientu va Ukrainie moža skłaści ad 15 da 20 tysiač čałaviek, a niekatoryja ŭdzielniki pieramoŭ raźličvajuć, što jana moža nablizicca i da 30 tysiač.

Kamientary da artykuła