Tusk: Polšča nie adpravić vojski va Ukrainu, heta kančatkovaje rašeńnie
Premjer-ministr Polščy Donald Tusk u efiry telekanała TVP Info zajaviŭ, što Polšča nie budzie adpraŭlać svaje vojski va Ukrainu. Na pytańnie, ci źjaŭlajecca hetaje rašeńnie kančatkovym, jon adkazaŭ stanoŭča.
«Tak, ale takoha cisku ŭvohule niama», — adkazaŭ Tusk na pytańnie, ci kančatkova pryniata rašeńnie nie adpraŭlać polskija vojski va Ukrainu.
Donald Tusk prakamientavaŭ pry hetym vykazvańnie śpiecyjalnaha pradstaŭnika ZŠA pa spravach Ukrainy Kita Kiełaha. Toj na minułym tydni na amierykanskim telekanale Fox Business zajaviŭ, što nibyta razhladajecca mahčymaść raźmiaščeńnia jeŭrapiejskich vojskaŭ na zachad ad Dniapra, i ŭ hetaj apieracyi mahła b udzielničać i Polšča.
Tusk adznačyŭ, što ŭsie jeŭrapiejskija partniory, uklučajučy prezidenta Francyi Emanuela Makrona, fiederalnaha kanclera Hiermanii Frydrycha Mierca i premjer-ministra Vialikabrytanii Kira Starmiera, rašuča asprečyli hetuju infarmacyju. Jon padkreśliŭ, što dla jaho heta było absalutna pryncypovaje pytańnie — polskija vojski nie buduć nakiravanyja va Ukrainu.
Premjer nahadaŭ, što Polšča nie maje płanaŭ adpraŭlać vajskoŭcaŭ va Ukrainu. Zamiest hetaha jaje rola — achoŭvać ułasnuju i jeŭrapiejskuju miažu z Rasijaj i Biełaruśsiu, a taksama zabiaśpiečvać łahistyčnuju padtrymku, naprykład, praz centr u Žešavie, praź jaki idzie dapamoha Ukrainie.
Jon taksama pryznaŭ, što byli aściarohi, nibyta takaja pazicyja Polščy moža pryvieści da jaje addaleńnia ad pryniaćcia jeŭrapiejskich rašeńniaŭ pa Ukrainie, asabliva kali Francyja i Vialikabrytanija padtrymlivajuć ideju vajskovaj prysutnaści, a Hiermanija vahajecca. Adnak, jak padkreśliŭ Tusk, hetaha nie adbyłosia — jon zastajecca ŭ pastajannym kantakcie ź lidarami hetych krain i navat maje znosiny z prezidentam ZŠA Donaldam Trampam.
Raniej zajavu Kita Kiełaha pra nibyta ŭdzieł polskich vojskaŭ u mahčymaj vajskovaj misii va Ukrainie abvierhli kiraŭnik Ministerstva abarony Polščy Uładzisłaŭ Kosiniak-Kamyš, a taksama ministr zamiežnych spraŭ Radasłaŭ Sikorski.
Kiełah: ZŠA razhladajuć mahčymaść raźmiaščeńnia zamiežnych vojskaŭ va Ukrainie
Francyja i Vialikabrytanija adpraviać va Ukrainu sumiesnuju vajskovuju misiju
Ukrainskaja armija niepieramožnaja — polski hienierał
Francyja tajna praviała vučeńni pa adbićci rasijskaha napadu na Ukrainu z terytoryi Biełarusi
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak9
Kamientary