Tramp abiacaje padtrymku pratestoŭcam u Iranie. Ale ci jość u jaho dastatkovyja siły?

Administracyja Donalda Trampa nieadnarazova zajaŭlała pra mahčymyja vajennyja dziejańni suprać Irana, dzie žorstka padaŭlajucca masavyja pratesty, što pačalisia ŭ kancy śniežnia. Ale na praktycy mahčymaści Trampa abmiežavanyja, piša The Moscow Times.

Avijanosiec USS Ford. Fota: U.S. Navy

Donald Tramp užo pierakinuŭ značnuju častku vojskaŭ ź Blizkaha Uschodu dla błakady Vieniesueły, u Kanhresie ŭźnikaje supraciŭ vajennym apieracyjam za miažoj, a krainy Piersidskaha zaliva nie hatovyja padtrymlivać ZŠA.

U minułym hodzie Tramp pieranakiravaŭ avijanosiec USS Ford i šerah inšych karabloŭ ź Blizkaha Uschodu ŭ Karybskaje mora, dzie jany zastajucca i ciapier. Avijanoscy ž USS Vinson i USS Nimitz, jakija raniej padtrymlivali ŭdary Izraila pa Iranie ŭ červieni 2025 hoda, daŭno pakinuli rehijon. Surjoznych pierakidańniaŭ vojskaŭ ci resursaŭ nie płanujecca.

Sistemy SPA Patriot, što pieramiaščalisia na Blizki Uschod z Paŭdniovaj Karei, viarnulisia na pastajannaje miesca dysłakacyi i tam zastajucca. Pry hetym ZŠA ŭžo vydatkavali šmat bojeprypasaŭ u Čyrvonym mory, Iranie i Vieniesuele, i ich niedachop moža stać prablemaj, kali pryjdziecca doŭha abaraniać vojski ad iranskich rakiet.

Iran maje vialiki arsienał rakiet, u ZŠA ž na avijabazie ŭ Katary znachodzicca kala 10 tysiač vajskoŭcaŭ, a taksama mienšyja hrupoŭki ŭ Iraku, Siryi i Iardanii. Kali amierykancy pačnuć bambić Iran, a toj adkaža, zapas rakiet-pierachopnikaŭ moža chutka skončycca, papiaredžvajuć byłyja supracoŭniki Pientahona.

U Vašynhtonie nie raskryvajuć kankretnych płanaŭ vajennych dziejańniaŭ, ale šancy na ataku ličacca vyšejšymi za jaje adsutnaść. Tramp słuchaje roznyja mierkavańni, ale ŭ kančatkovym vyniku prymaje toje rašeńnie, jakoje ličyć najlepšym.

Ale mahčymaści dziejańniaŭ abmiažoŭvaje i apazicyja ŭ Kanhresie, i krainy Blizkaha Uschodu. Saudaŭskaja Aravija, Aman i Katar nie žadajuć vajennaj apieracyi, śćviardžajučy, što heta vykliča turbulencyju na naftapraduktavych rynkach i naškodzić ekanomicy ZŠA. Saudaŭskija čynoŭniki taksama paabiacali, što nie dapuściać vykarystańnia svajoj pavietranaj prastory dla ŭdaraŭ pa Iranie.

Navat prychilniki Trampa ŭ Kanhresie vystupajuć suprać uvodu vojskaŭ. Jany padtrymlivajuć sankcyi i ekanamičny cisk, ale nie pramoje ŭmiašańnie.

Amierykancy mohuć nie stvarać pastajannuju vajskovuju prysutnaść u rehijonie, a pierakidać vojski i avijacyju dla abmiežavanych udaraŭ, jak heta było ŭ červieni 2025‑ha pry bambavańni iranskich jadziernych abjektaŭ. Kali dypłamatyja nie spracuje, mahčymyja taksama kibierataki.

U vypadku avijaŭdaraŭ hałoŭnymi celami buduć «centry režymu», kamandnyja punkty, vajskovyja abjekty i važnyja linii i srodki suviazi. Pa słovach adstaŭnoha amierykanskaha admirała Džona Milera, vialikaha narastańnia siły ŭ Piersidskim zalivie nie budzie — apieracyi buduć abmiežavanyja abo ź blizkich da Irana bazaŭ, abo hłabalna z terytoryi ZŠA.

Kamientary da artykuła