Pratestoŭcy ŭ Iranie ŭpieršyniu za niekalki dzion zmahli datelefanavacca za miažu i raskazać pra situacyju ŭnutry krainy

Pavodle źviestak amierykanskaha Ahienctva navin pravaabaroncaŭ (Human Rights Activists News Agency), ranicaj u sieradu kolkaść zahinułych dasiahnuła jak minimum 2 571 čałavieka. Hetaja ličba značna pieravyšaje kolkaść achviar lubych inšych chval pratestaŭ abo biesparadkaŭ u Iranie za apošnija dziesiacihodździ i nahadvaje chaos vakoł Isłamskaj revalucyi 1979 hoda.

Iranskaje dziaržaŭnaje telebačańnie ŭpieršyniu aficyjna pryznała fakty hibieli ludziej, cytujučy čynoŭnika, jaki zajaviŭ, što ŭ krainie «šmat pakutnikaŭ».

Demanstracyi pačalisia naprykancy śniežnia na fonie niezadavolenaści drennym stanam ekanomiki Irana i nieŭzabavie byli skiravanyja suprać teakratyčnaj ułady, u pryvatnaści suprać 86‑hadovaha viarchoŭnaha lidara ajatały Ali Chamieniei.

Atrymanyja ŭ aŭtorak ahienctvam Associated Press zdymki z akcyj pratestu ŭ Tehieranie pakazvajuć hrafici i łozunhi z zaklikami da śmierci Chamieniei — za što ŭ Iranie moža pahražać śmiarotnaje pakarańnie.

Na fonie rostu paviedamlenaj kolkaści achviar u aŭtorak prezident ZŠA Donald Tramp napisaŭ u svajoj sacyjalnaj sietcy Truth Social: «Iranskija patryjoty, PRACIAHVAJCIE PRATESTY — BIARYCIE PAD KANTROL SVAJE INSTYTUCYI!!!». Adnak praź niekalki hadzin Tramp zajaviŭ žurnalistam, što jaho administracyja čakaje dakładnych źviestak pra kolkaść zabitych pratestoŭcaŭ, pierš čym dziejničać «adpaviednym čynam».

Havoračy pra iranskija siłavyja struktury, Tramp adznačyŭ: «Mnie zdajecca, što jany pavodzili siabie vielmi drenna, ale heta nie paćvierdžana».

Iranskija ŭłady znoŭ papiaredzili Trampa ab niedapuščalnaści ŭmiašańnia. Sakratar Najvyšejšaj rady nacyjanalnaj biaśpieki Irana Ali Łarydžani, adkazvajučy na pazicyju ZŠA, napisaŭ: «My abviaščajem imiony hałoŭnych zabojcaŭ naroda Irana: 1 — Tramp, 2 —premjer-ministr Izraila Bińjamin Nietańjachu.

Pavodle źviestak aktyvisckaj hrupy, 2 403 z zahinułych byli pratestoŭcami, a 147 — asobami, źviazanymi z uradam. Zahinuli taksama 12 dziaciej, a jašče dzieviać mirnych žycharoŭ, jakija, jak śćviardžajecca, nie ŭdzielničali ŭ pratestach. Bolš za 18 100 čałaviek byli zatrymanyja, paviedamiła hrupa.

Aceńvać maštaby demanstracyj z-za miažy stanovicca ŭsio ciažej, i ahienctva AP nie zmahło niezaležna paćvierdzić kolkaść achviar.

Skajler Tompsan z Ahienctva navin pravaabaroncaŭ (Human Rights Activists News Agency) zajaviła AP, što novaja ličba šakavała, asabliva z ulikam taho, što jana ŭ čatyry razy pieravysiła kolkaść zahinułych padčas šmatmiesiačnych pratestaŭ 2022 hoda, vyklikanych śmierciu Machsy Amini, usiaho za dva tydni.

Jana papiaredziła, što kolkaść achviar budzie raści i nadalej: «My ŭ žachu, ale ŭsio ž ličym, što hetaja ličba zanižanaja».

Razmaŭlajučy pa telefonie ŭpieršyniu paśla taho, jak suviaź z vonkavym śvietam była pierapynienaja, iranskija śviedki apisali mocnuju prysutnaść sił biaśpieki ŭ centry Tehierana, zharełyja budynki dziaržaŭnych ustanoŭ, raźbityja bankamaty i amal poŭnuju adsutnaść minakoŭ.

U toj ža čas ludzi byli zaniepakojenyja tym, što budzie dalej, u tym liku mahčymaściu ŭdaru z boku ZŠA.

«Maje klijenty abmiarkoŭvajuć reakcyju Trampa i razvažajuć, ci nie płanuje jon vajenny ŭdar pa Isłamskaj Respublicy», — skazaŭ uładalnik kramy Machmud, jaki nazvaŭ tolki svajo imia ź mierkavańniaŭ biaśpieki. «Ja nie čakaju, što Tramp abo lubaja inšaja zamiežnaja kraina kłapociacca pra intaresy irancaŭ».

Reza, kiroŭca taksi, jaki taksama nazvaŭsia tolki pa imieni, skazaŭ, što pratesty nie sychodziać z dumak mnohich ludziej. «Ludzi — asabliva maładyja — u rospačy, ale jany havorać pra toje, kab praciahvać pratesty», — adznačyŭ jon.

• 6
• 0
• 0
• 0
• 11
• 8
• 0
• 1