Viasnoj u Minsk pryviazuć karcinu Šahała

U krasaviku ŭ biełaruskaj stalicy projduć Dni Ruskaha muzieja. Pra heta ŭ efiry ANT paviedamiła dyrektarka Nacyjanalnaha mastackaha muzieja Iryna Macias.

Mark Šahał. «Prahułka»

Iryna adznačyła, što biełaruskija muziei nie majuć u svaich zborach takoj kolkaści suśvietna viadomych šedeŭraŭ, jak rasijskija abo jeŭrapiejskija. U toj ža čas pamiž Nacyjanalnym mastackim muziejem i Ruskim muziejem padpisanaja damova ab supracoŭnictvie.

Pavodle słoŭ dyrektarki muzieja, u miežach Dzion Ruskaha muzieja ŭ Minsk płanujecca pryvieźci karcinu Marka Šahała «Prahułka». Pradstavić bolš šyrokuju ekspazicyju tvoraŭ mastaka ŭ Biełarusi składana, choć taki prajekt vyhladaŭ by vielmi pryvabna. Asnoŭnaja pieraškoda — nadzvyčaj vysoki košt strachavańnia rabot.

Karcina «Prahułka nad Viciebskam» ličycca adnoj z samych viadomych u tvorčaści Marka Šahała. Jana była napisanaja ŭ 1917—1918 hadach i maje vyrazna aŭtabijahrafičny charaktar. Mastak stvaryŭ jaje paśla šlubu z žonkaj Bełaj i naradžeńnia dački Idy: na pałatnie jon staić na ziamli, a jahonaja žonka nibyta lacić u pavietry.

«Prahułka» ŭvachodzić u trypcich razam z karcinami «Dvajny partret» i «Nad horadam». U 1973 hodzie Mark Šahał naviedvaŭ Saviecki Sajuz i śpiecyjalna zajšoŭ u Traciakoŭskuju halereju, kab ubačyć hetuju rabotu, jakaja tady tam ekspanavałasia.

Kamientary da artykuła