Italjanskaja harnałyžnica stała alimpijskaj čempijonkaj, mienš čym za hod adnaviŭšysia paśla ciažkaha pierałomu
35‑hadovaja italjanskaja harnałyžnica Fiederyka Bryńjone siensacyjna vyjhrała spabornictvy ŭ supierhihancie na chatniaj Alimpijadzie. Pry hetym da apošniaha momantu było niezrazumieła, ci zmoža jana ŭvohule na hulniach vystupić.
Fiederyka Bryńjone. Fota: AP Photo/Jacquelyn Martin
Paśla strašnaha padzieńnia ŭ krasaviku 2025 hoda Bryńjone atrymała pierałom vialikaj i małoj halonačnych kostak i razryŭ kryžapadobnych źviazak. Amal hod jana pryśviaciła reabilitacyi i stała na łyžy tolki za dva tydni da pačatku hulniaŭ.
Spabornictvy ŭ Karcina-d'Ampieca prachodzili ŭ vielmi składanych umovach — śnieh i tuman istotna ŭskładnili trasu. Mnohija favarytki nie zmahli finišavać. Adnak Bryńjone na rodnaj trasie pakazała najlepšy vynik — 1.23,41. Druhoje miesca zaniała francužanka Raman Miradoli, treciaje — aŭstryjka Karnelija Chiutar.
Uličvajučy, praz što daviałosia prajści spartsmiency, jaje brat i trenier Davide Bryńjone nie zmoh strymać emocyj. Jon nieadnarazova padkreślivaŭ, što viartańnie paśla takoj traŭmy patrabuje vialikaha ciarpieńnia i siły voli, a bol — častka pracesu adnaŭleńnia.
Fiederyka pierad tym užo była trochrazovaj pryziorkaj Alimpijskich hulniaŭ: u 2018 hodzie ŭ karejskim Pchiončchanie jana zavajavała srebra, a ŭ 2022‑m — dźvie bronzy. Da poŭnaha kamplektu ŭznaharod joj nie chapała tolki zołata, jakoje ciapier taksama jość.
Čytajcie taksama:
Frańja fon Almien staŭ trochrazovym alimpijskim čempijonam
Narviežac Jochanes Kleba staŭ siamirazovym alimpijskim čempijonam. Da rekorda zusim blizka