Amierykanski fihuryst vykanaŭ na Alimpijadzie elemient, jaki 50 hadoŭ byŭ zabaronieny, — za jaho nie dajuć bałaŭ, ale hledačy ŭ zachapleńni VIDEA
Salta nazad u fihurnym katańni doŭhi čas znachodziłasia pad strohaj zabaronaj i dahetul asobna nie aceńvajecca sudździami. Adnak mienavita hety elemient u vykanańni amierykanskaha fihurysta Illi Malinina staŭ adnym z samych abmiarkoŭvajemych momantaŭ na zimovych Alimpijskich hulniach.
21‑hadovy spartsmien Illa Malinin na Alimpijadzie ŭ Miłanie pradstaŭlaje Złučanyja Štaty ŭ mužčynskim adzinočnym katańni. Jon naradziŭsia ŭ śniežni 2004 hoda ŭ ZŠA ŭ siamji viadomych fihurystaŭ Taćciany Malininaj i Ramana Skarniakova. Jaho baćki ŭ svoj čas vystupali za Uźbiekistan, ale paźniej pierabralisia ŭ Štaty.
Na siońniašni dzień Illa źjaŭlajecca čatyrochrazovym čempijonam ZŠA i dvuchrazovym čempijonam śvietu. Pavodle stanu na kaniec 2025 hoda jon zajmaŭ pieršaje miesca ŭ suśvietnym rejtynhu Mižnarodnaha sajuza kańkabiežcaŭ.
Malinin užo ŭpisaŭ svajo imia ŭ historyju jak pieršy fihuryst, jaki zdoleŭ paśpiachova vykanać na aficyjnych spabornictvach čaćviarny aksiel — samy składany skačok, jaki patrabuje 4,5 abarota ŭ pavietry.
Jon taksama źjaŭlajecca pieršym i adzinym u historyi spartsmienam, jaki vykanaŭ usie vidy čaćviarnych skačkoŭ na mižnarodnaj arenie: aksiel, rytbierhier, salchaŭ, łutc, tułup i flip. Vałodańnie hetym arsienałam dazvalaje Illi nabirać kałasalnuju kolkaść bałaŭ, što robić jaho praktyčna niepieramožnym dla kankurentaŭ.
Adnak sapraŭdny ažyjataž padčas vystupleńniaŭ Malinina, jak piša The Wall Street Journal, vyklikajuć nie tolki jaho techničnyja rekordy, ale i adzin kankretny elemient — salta nazad na lodzie. Hety truk, jaki bolš nahadvaje akrabatyku z himnastyki ci frystajła, byŭ zabaronieny ŭ fihurnym katańni amal paŭstahodździa. Paśla taho, jak jaho ŭpieršyniu prademanstravali na Alimpijadzie 1976 hoda, elemient pryznali zanadta niebiaśpiečnym i vyklučyli z aficyjnaha śpisa dazvolenych ruchaŭ.
Niekatoryja fihurysty pry hetym jaho praciahvali rabić. Tolki ŭ 2024 hodzie Mižnarodny sajuz kańkabiežcaŭ źniaŭ pramuju zabaronu: za salta pierastali źnižać acenku (štrafavać), ale i asobnych bałaŭ za jaho ŭsio jašče nie naličvajuć.
Niahledziačy na toje, što salta nazad nie prynosić naŭprostavaj vyhady ŭ bałach i źviazana z kałasalnaj ryzykaj, Malinin pryncypova ŭklučyŭ jaho ŭ svaje prahramy. Padrychtoŭka da hetaha patrabavała asobnych namahańniaŭ: napačatku spartsmien treniravaŭsia sa śpiecyjalnaj strachoŭkaj, kab minimizavać mahčymaść traŭmy. Ciapier fihuryst vykonvaje elemient nastolki ŭpeŭniena, što jon staŭ efiektnym finalnym akordam jaho vystupleńniaŭ.
Jak zaŭvažaje WSJ, jahonyja salta, vykananyja na vielizarnaj chutkaści ź biezdakornym pryziamleńniem, litaralna zavajoŭvajuć publiku, vyklikajučy ŭ hledačoŭ adnačasova i šok, i nievierahodnaje zachapleńnie. Mienavita vystup Malinina zabiaśpiečyŭ zbornaj ZŠA zołata ŭ kamandnym turniry na hetaj Alimpijadzie.
Ciapier čytajuć
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie26
Kamientary