U Maskvie zamiest Muzieja historyi HUŁAHa adkryvajuć muziej, pryśviečany achviaram niamieckich nacystaŭ
U Maskvie na miescy Muzieja historyi HUŁAHa płanujuć adkryć novuju ŭstanovu — Muziej pamiaci, pryśviečany «achviaram hienacydu savieckaha naroda». Pra pierajmienavańnie pieršaj paviedamiła mastactvaznaŭca Ksienija Karabielnikava. Krynica ahienctva «Interfaks» paćvierdziła, što infarmacyja adpaviadaje rečaisnaści i ŭžo była abjaŭlenaja supracoŭnikam muzieja, piša «Nastojaŝieje vriemia».
Pavodle infarmacyi ad meryi Maskvy, asnovaj novaj ekspazicyi stanuć archiŭnyja materyjały prajekta «Biez terminu daŭniny», inicyjavanaha Pošukavym rucham Rasii.
Płanujecca, što muziej budzie aśviatlać usie etapy vajennych złačynstvaŭ nacystaŭ u hady Druhoj suśvietnaj vajny. Adkryćcio zapłanavana na 2026 hod. Kiravać ustanovaj budzie Natalla Kałašnikava, jakaja ź viasny 2025 hoda ŭznačalvaje muziej «Smalenskaja krepaść».
Muziej historyi HUŁAHa dziejničaŭ z 2001 hoda. U listapadzie 2024‑ha jaho pracu prypynili, spasłaŭšysia na parušeńni patrabavańniaŭ pažarnaj biaśpieki. U studzieni 2025 hoda ŭłady Maskvy zvolnili dyrektara Ramana Ramanava, jaki kiravaŭ muziejem z 2012 hoda. Paźniej jaho miesca zaniała kiraŭnica Muzieja Maskvy Hanna Trapkova.
Pavodle paviedamleńniaŭ ŚMI, navat paśla zakryćcia supracoŭniki praciahvali daśledčuju pracu: udzielničali ŭ ekśpiedycyjach, zapisvali ŭspaminy represavanych i rychtavali knihi pa historyi HUŁAHa. Taksama śćviardžałasia, što Ramanava zvolnili paśla jahonaj admovy cenzuravać vystavu, pryśviečanuju savieckim represijam.
Čytajcie taksama:
Čarha na dva hady: jak muziej Pietrusia Broŭki staŭ samym deficytnym miescam dla spatkańniaŭ
Vilenski biełaruski muziej imia Ivana Łuckieviča vyjhraŭ tendar na prava arendy raniejšaha budynka
Inicyjatyva Maldzis vykupiła 30 litahrafij mastaka Napaleona Ordy