Čarha na dva hady: jak muziej Pietrusia Broŭki staŭ samym deficytnym miescam dla spatkańniaŭ
Litaraturny muziej Pietrusia Broŭki, imavierna, pastaviŭ rekord siarod kulturnych ustanoŭ krainy: čarha na viečarovuju prahramu «Muziej dla dvaich» raściahnułasia da studzienia 2028 hoda. Hety niezvyčajny farmat, jaki dazvalaje zakachanym zastacca ŭ załach paśla ich zakryćcia, vyklikaŭ sapraŭdny ažyjataž.
Staršy navukovy supracoŭnik muzieja Karyna Kuščanka zhadvaje, što ŭsio pačałosia jašče ŭ 2015 hodzie z prostaha konkursu da Dnia śviatoha Valancina, piša «Sputnik».
Tady zakachanyja pary zmahalisia za prava pravieści viečar u muziei, raźmiaščajučy svaje fota z cytatami paeta, ale z 2023 hoda pasłuha stała pastajannaj. «Sapraŭdnaja papularnaść abrynułasia na nas paśla taho, jak u muziej pryjšli błohierki. Jany praviali ŭ nas dziavočnik, źniali rolik, jaki potym zavirusiŭsia ŭ sacyjalnych sietkach», — kaža Karyna Kuščanka.
U muziei da takoha ažyjatažu staviacca pazityŭna, kažuć, na nahruzcy supracoŭnikaŭ hetyja viačernija mierapryjemstvy (a pravodziacca jany z 19:00 da 22:00) nijak nie adbilisia — u ich davoli hnutki hrafik pracy.
Sakret papularnaści spatkańniaŭ u muziei kryjecca ŭ ekskluziŭnaści i atmaśfiery «tolki dla svaich». Zakachanym prapanujuć nie prosta špacyr, a tematyčnuju ekskursiju z akcentam na historyju kachańnia Pietrusia Broŭki i jaho žonki Aleny Michajłaŭny.
Haściam demanstrujuć unikalnyja pradmiety z fondaŭ, jakija niemahčyma ŭbačyć u zvyčajnaj ekspazicyi. Pryčym pa muziejnych praviłach takija rarytety možna pakazvać nie čaściej za dva razy na tydzień, što i stvaraje ščylnaść hrafika.
«Choć i pakazvajem my ich, jak naležyć, u biełych palčatkach, ale pa muziejnych praviłach rabić heta možna tolki dva razy na tydzień. Voś u hetym jakraz i zaklučajecca ekskluziŭnaść hetaj pasłuhi», — tłumačać u muziei.
A zatym naviedvalnikam mohuć u ramantyčnych abstavinach papić harbaty z vodaram čaboru «Pachnie čabor» (pa naźvie znakamitaha liryčnaha vierša Broŭki) u samym dalokim pakoi muzieja ź vidam na Minsk.
Ciapier zapis viadziecca na studzień 2028-ha, heta značyć čarha raściahnułasia na dva hady.
Cikava, što niahledziačy na dvuchhadovaje čakańnie, ludzi admaŭlajucca ad svaich numaroŭ u čarzie vielmi redka.
Dla tych, chto nie hatovy čakać da 2028 hoda, isnuje adziny sposab abyści sistemu — vyjhrać śpiecyjalny siertyfikat padčas «Nočy muziejaŭ».
Dla vialikich kampanij muziej prapanuje alternatyvu — «Muziej dla siabroŭ», dzie možna pahulać u aŭtentyčnyja nastolnyja hulni minułaj epochi. Supracoŭniki padkreślivajuć, što takija interaktyvy dazvalajuć «pakazać Broŭku ź inšaha boku», adkryvajučy naviedvalnikam jaho chobi i nieaficyjnaje žyćcio.
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ3
Kamientary