Stali viadomyja padrabiaznaści padrychtoŭki terakta ŭ maskoŭskim «Krokusie» dva hady tamu

12 sakavika byŭ vyniesieny prysud pa spravie ab terarystyčnym akcie ŭ maskoŭskaj kancertnaj zale «Krokus Sici Choł» u sakaviku 2024 hoda: piatnaccać fihurantaŭ, u tym liku čaćviora niepasrednych vykanaŭcaŭ teraktu, atrymali pažyćciovyja terminy. Pieršyja 16—18 hadoŭ jany praviaduć u turmie, a paśla buduć pieraviedzienyja ŭ kałonii asablivaha režymu. Ich čatyroch saŭdzielnikaŭ asudzili na terminy ad 19 da 22 hadoŭ. Rasijskaje vydańnie «Kommiersant» raskazała padrabiaznaści hučnaj spravy, jakija raskrylisia padčas pracesu.

Padčas sudovaha pracesu. Fota: Anton Novadziarožkin / Kommiersant

Rasśledavańnie kryminalnaj spravy ab terakcie ŭ «Krokus Sici Chole» raskryła maštabnuju sietku padrychtoŭki, jakaja pačałasia jašče ŭ 2023 hodzie. Arhanizatarami vystupili lidary hrupovak «Isłamskaja dziaržava» i «Viłajat Charasan», jakija stvaryli ŭ Rasii jak minimum try terarystyčnyja jačejki. Viarboŭka rabiłasia praz Telegram, dzie budučyja vykanaŭcy davali klatvu viernaści terarystam.

Adnym z klučavych fihurantaŭ staŭ Šamsidzin Faryduni, jaki raniej užo mieŭ sudzimaść u Tadžykistanie. Psichijatryčnaja ekśpiertyza pryznała jaho adekvatnym, adnak adznačyła jaho chvaravituju ambicyjnaść i złapomnaść. Razam z paplečnikami jon prachodziŭ śpiecpadrychtoŭku ŭ Turcyi, a adzin z udzielnikaŭ navat vyjazdžaŭ u Pakistan i Afhanistan dla navučańnia bajavym navykam.

Zbroju dla teraktu rychtavali ŭ Rasii: piać aŭtamataŭ dla chałastoj stralby byli pieraroblenyja ŭ bajavyja ŭ samatužnych umovach u Inhušecii, adtul ža pryvieźli bolš za 1800 patronaŭ. Pistalet Makarava dastavili ź Jekaciarynburha.

Pieršapačatkova terarysty płanavali napad u Dahiestanie, ale tuju jačejku svoječasova vykryła FSB, tamu jany zasiarodzilisia na Maskvie. «Krokus» byŭ vybrany z-za jaho blizkaści da časovaha žylla terarystaŭ u padmaskoŭnym Puciłkavie.

Faryduni zahadzia chadziŭ na kancert italjanskaha opiernaha śpievaka Alasandra Safiny, kab vyvučyć achovu, schiemu załaŭ i zapasnyja vychady. U dzień teraktu jon navat mieŭ sprečku ź pierakupščycaj kvitkoŭ, bo ŭ jaho nie chapała najaŭnych hrošaj i jamu daviałosia šukać bankamat, pakul jaho saŭdzielniki čakali ŭ mašynie, užyvajučy narkotyki.

Niepasredny napad pačaŭsia kala vośmaj hadziny viečara 22 sakavika. Terarysty dziejničali vielmi žorstka, rasstrelvajučy ludziej va ŭpor. Adnak śledstva vyśvietliła, što achviar mahło być značna bolš, kali b nie techničnyja zboi: u dvuch napadnikaŭ zakliniła aŭtamaty, a patrony ŭ zaplečnikach pačali zakančvacca ŭžo praź dziesiać chvilin. Mienavita tamu jany pierajšli da padpałaŭ, vykarystaŭšy zahadzia narychtavany bienzin u butelkach. Ahoń adrezaŭ ludziej ad vychadaŭ, što pryviało da hibieli bolšaści sa 147 achviar ad udušša i apiokaŭ.

Usia akcyja zaniała ŭsiaho 13 chvilin, paśla čaho terarysty źbiehli, pa darozie źbiŭšy siamju ź dziećmi. Ich zatrymali ŭ Branskaj vobłaści paśla pahoni i stralaniny.

Na sudzie 15 čałaviek atrymali pažyćciovyja terminy. Siarod ich nie tolki zabojcy, ale i tyja, chto dapamahaŭ z hrašyma, žyllom i transpartam. Prysud vyklikaŭ abureńnie ŭ paciarpiełych, jakija ličać jaho zanadta miakkim praz tearetyčnuju mahčymaść umoŭna-daterminovaha vyzvaleńnia ŭ budučyni. Advakaty achviar navat prapanoŭvali prypynić dla takich vypadkaŭ maratoryj na śmiarotnaje pakarańnie.

Paralelna Śledčy kamitet Rasii praciahvaje rasśledavać dziejańni kiraŭnictva «Krokusa», čyja sistema biaśpieki i supraćpažarnaja abarona nie zmahli pieraškodzić takoj kolkaści achviar.

Kamientary da artykuła