Isłamisty, adkaznyja za vybuch u «Krokusie», nazvali svaje nastupnyja celi
«IDIŁ-Charasan» pieraličyŭ śpis celaŭ dla terarystyčnych napadaŭ u nastupnym, siarod ich — Aktobarfest i Kanski kinafiestyval, piša BILD.
Adhalinavańnie IDIŁ «Isłamskaja dziaržava ŭ pravincyi Charasan» na svajoj prapahandysckaj płatformie nazvała patencyjnyja celi dla napadaŭ sioleta: Aktobarfest u Miunchienie, karnavał u Vieniecyi, kinafiestyval u Kanach i opierny bal u Vienie.
Mienavita hetaje adhalinavańnie IDIŁ uziało na siabie adkaznaść za terarystyčnuju ataku na maskoŭski «Krokus Sici Choł» amal 10 miesiacaŭ tamu, u vyniku jakoj zahinuła bolš za 140 čałaviek.
Supracoŭnik słužby dziaržaŭnaj biaśpieki FRH raspavioŭ BILD, čamu da pahrozy varta stavicca surjozna: «Kanflikt ź Izrailem praciahvaje zabiaśpiečvać vysoki ŭzrovień mabilizacyi siarod isłamistaŭ. Akramia taho, niadaŭnija terakty pakazali, što dastatkova aŭtamabila abo naža. Patencyjnyja napadniki taksama heta razumiejuć».
«IDIŁ-Charasan» raniej stvarała ŭ Hiermanii terarystyčnyja jačejki, zamaskiravanyja pad hrupy biežancaŭ z Ukrainy. Orhanam biaśpieki ŭdałosia raskryć i praduchilić płany napadaŭ. Tak, hod tamu napiaredadni Kaladaŭ i Novaha hoda isłamisty z Tadžykistana, imavierna, źbiralisia atakavać Kiolnski sabor i Sabor Śviatoha Stefana ŭ Vienie.
Siem niebiaśpiečnych isłamistaŭ znachodziacca ciapier na łavie padsudnych za płanavańnie napadaŭ na jaŭrejaŭ, libieralnych musulman i kaladny kirmaš u Hiermanii. Jak miarkujecca, jany byli tajemna pierapraŭlenyja z Tadžykistana ŭ Zachodniuju Jeŭropu. Im pradjaŭlenyja abvinavačvańni ŭ stvareńni i členstvie ŭ terarystyčnaj arhanizacyi.
Pavodle rasśledavańnia Fiederalnaha viedamstva kryminalnaj palicyi Hiermanii, padazravanyja ŭ teraryźmie mieli na mecie «ździejśnić hučnyja terakty ŭ Hiermanii i Zachodniaj Jeŭropie, kab prasoŭvać mety i zadačy «Isłamskaj dziaržavy»». Dla hetaha jany navat chacieli adsiekčy hałavu «niaviernamu» ŭ metach zastrašvańnia.
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary