Śviet

Śledstva abvierhła zajavy Pucina ab datyčnaści Ukrainy da teraktu ŭ «Krokusie»

U materyjałach spravy havorycca, što terarysty byli zavierbavany afhanskaj jačejkaj «Isłamskaj dziaržavy» «Viłajat Charasan». A zakazčykaŭ nie znajšli, piša «Ahienctva».

«Krokus Sici Choła» paśla ataki. Fota: AP Photo/Vitaly Smolnikov

Śledstva abvierhła zajavy rasijskich uładaŭ pra dačynieńnie Ukrainy da teraktu ŭ padmaskoŭnym kancertnym zale «Krokus» 22 sakavika 2024 hoda.

Kančatkovaja viersija śledstva zaklučajecca ŭ tym, što terarysty byli zavierbavany afhanskaj jačejkaj «Isłamskaj dziaržavy» «Viłajat Charasan», raspavioŭ advakat adnaho z abvinavačanych.

Z materyjałaŭ vynikaje, što rašeńnie jechać va Ukrainu źjaviłasia ŭžo paśla taho, jak terarysty nie pasłuchalisia zahadu ŭstupić u pierastrełku z pravaachoŭnikami (i, vierahodna, zahinuć) u «Krokusie». Hetyja vysnovy śledstva supiarečać zajavam, jakija hałava FSB Alaksandr Bortnikaŭ i Uładzimir Pucin rabili paśla teraktu.

Pavodle materyjałaŭ spravy, ź jakimi aznajomiŭsia advakat pa pryznačeńni Aleh Vłasaŭ, terarystaŭ zavierbavała kiraŭnictva «Viłajat Charasan». Pry hetym «niepasrednyja zakazčyki» adznačany nie byli, vynikaje z 420 tamoŭ spravy.

Paśla teraktu złačyncy atrymali ad arhanizataraŭ zahad zastavacca na miescy i «sustreć» siłavikoŭ, ale nie padparadkavalisia jamu i zamiest hetaha źjechali z «Krokusa», raspavioŭ «Kommiersantu» Ułasaŭ. Kali kuratary daviedalisia pra heta, to paraili terarystam ruchacca da miažy z Ukrainaj, ale nie dali instrukcyj pa pierachodu miažy.

«Moža być, arhanizatary spadziavalisia, što pry pierachodzie miažy ich zastrelać albo našy, albo na tym baku», — ličyć juryst.

Dakładnaj farmuloŭki matyvaŭ napadu, pavodle słoŭ Ułasava, u spravie niama. Adno ź mierkavańniaŭ zaklučajecca ŭ tym, što terakt moh być źviazany z abvastreńniem u izrailska-arabskich adnosinach, raskazaŭ jon.

Hetyja detali materyjałaŭ śledstva supiarečać viersii, jakoj publična prytrymlivalisia rasijskaje kiraŭnictva adrazu paśla teraktu.

Užo na nastupny dzień paśla napadu Pucin havaryŭ pra «akno», jakoje, pa jaho słovach, dla terarystaŭ rychtavali «z ukrainskaha boku». Praz try dni paśla teraktu prezident havaryŭ pra «kijeŭski śled» i isnavańnie zakazčyka, jaki ździejśniŭ terakt «rukami radykalnych isłamistaŭ». Metami teraktu jon nieŭzabavie paśla napadu nazyvaŭ «naniasieńnie škody našamu adzinstvu». Taksama jon havaryŭ, što Rasija «nie moža być abjektam terarystyčnych atak z boku isłamskich fundamientalistaŭ» praz toje, jak Maskva pavodzić siabie «na źniešniaj arenie».

Dyrektar FSB Alaksandr Bortnikaŭ nieŭzabavie paśla teraktu śćviardžaŭ, što napad staŭ śviedčańniem taho, što «ŭkrainskija nieanacysty i ich zachodnija apiekuny» arhanizujuć «sovieršienije samych varvarskich priestuplenij na tierritorii našieho hosudarstva». Paźniej jon kazaŭ, što terakt rychtavali «jak sami radykały-isłamisty, tak, naturalna, spryjali zachodnija śpiecsłužby, a sami śpiecsłužby Ukrainy da hetaha majuć niepasrednaje dačynieńnie».

Da vosieni minułaha hoda Bortnikaŭ kazaŭ užo pra toje, što tyja, chto zavierbavaŭ terarystaŭ, byli členami «Viłajata Charasan» i «pracavali pa tadžykskaj dyjaspary ŭ Rasii praź internet, fizična znachodziačysia ŭ Afhanistanie».

«Isłamskaja dziaržava» ŭziała na siabie adkaznaść za terakt u pieršyja hadziny paśla napadu. Hrupoŭka apublikavała videa z «Krokusa», źniataje terarystami. Ab tym, što za teraktam staić ID, paviedamlali i zachodnija śpiecsłužby.

U pačatku sakavika ŭ ZŠA aryštavali člena ID Muchamada Šaryfułu, jaki, jak paviedamiła amierykanskaje Miniust, pryznaŭsia, što instruktavaŭ terarystaŭ, što napali na «Krokus».

«Padčas dopytu FBR Šaryfuła pryznaŭsia, što ad imia ID jon dzialiŭsia instrukcyjami pra toje, jak vykarystoŭvać aŭtamaty Kałašnikava i inšaje ŭzbrajeńnie, z patencyjnymi napadnikami. Šaryfuła taksama pryznaŭ, što paznaŭ dvuch z čatyroch zatrymanych bajevikoŭ jak tych, kaho jon raniej instruktavaŭ», — havorycca ŭ paviedamleńni viedamstva.

U terakcie ŭ «Krokusie» 22 sakavika 2024 hoda zahinuli 145 čałaviek, u tym liku troje biełarusaŭ. Jašče 551 čałaviek atrymaŭ ranieńni.

Kamientary

Ciapier čytajuć

Miljanier Varabiej atrymaŭ prava na zabudovu centra Minska — uzamien za darahuju kliniku dla Łukašenki7

Miljanier Varabiej atrymaŭ prava na zabudovu centra Minska — uzamien za darahuju kliniku dla Łukašenki

Usie naviny →
Usie naviny

«Mikołu Statkieviča škada jak čałavieka, ale nie jak bykaŭskaha hieroja»21

«Pralacieła šmat roznych dumak». Rybak raskazaŭ, jak da jaho ŭ efir uvarvaŭsia łoś

«Ciarpieńnie — najlepšaja zbroja pieramožanych». Konrad Adenaŭer, abo Palityki jakoha typu patrebnyja paśla dyktatury19

Maładoj mamie z Navahrudka dali 6 hadoŭ za karupcyju. Jana dakazała svaju nievinavataść — ale kali ŭžo adsiedzieła6

«Chaciełasia, kab žyćcio pastaviła mianie na miesca». Biełarus prajechaŭ bolš za 250 kiłamietraŭ pa Aŭstryi na rolikach4

Milicyja abviarhaje, što ŭ hibieli katoŭ u Minsku vinavaty skurałup3

U Minsku nieŭzabavie adkryjecca muziej piva1

Tramp uvioŭ dla inšaziemcaŭ «załatuju kartu» za $100 tysiač4

Ministarka abarony Litvy zaklikała źbivać rasijskija źniščalniki15

bolš čytanych navin
bolš łajkanych navin

Miljanier Varabiej atrymaŭ prava na zabudovu centra Minska — uzamien za darahuju kliniku dla Łukašenki7

Miljanier Varabiej atrymaŭ prava na zabudovu centra Minska — uzamien za darahuju kliniku dla Łukašenki

Hałoŭnaje
Usie naviny →

Zaŭvaha:

 

 

 

 

Zakryć Paviedamić