Rasija pastrožyła pryjom tadžykaŭ paśla «Krokusa», dyk jany ciapier sprabujuć u abychod — praź Biełaruś
Paśla letašnich rasstrełaŭ u maskoŭskim Krokusie ŭ Rasii pieramianiłasia staŭleńnie da pracoŭnych mihrantaŭ z Tadžykistana. Pucinskija śpiecsłužby bačać u nizkaadukavanych, biednych, ale relihijnych tadžykskich mihrantach patencyjnuju pahrozu biaśpiecy i roznymi šlachami abmiažoŭvać prytok. Što robiać tyja ŭ adkaz? Kuplajuć kvitki da Minska.
Staŭleńnie da tadžykaŭ u Rasii abvastryłasia paśla letašniaha teraktu ŭ «Krokusie», dzie čaćviora hramadzian Tadžykistana zabili 145 naviednikaŭ kancertu.
Ale terakt u Maskvie — tolki častka bolš šyrokaj karciny ŭdziełu hramadzian Tadžykistana ŭ zabojstvach na relihijnaj hlebie.
U tym ža 2024 hodzie dvoje tadžykaŭ stali vykanaŭcami teraktu ŭ iranskim Kiermanie, Taliban nazyvaje hramadzian Tadžykistana asnoŭnymi vykanaŭcami teraktaŭ u Afhanistanie apošnich hadoŭ.
Składanaja sacyjalna-ekanamičnaja situacyja ŭ Tadžykistanie, daminavańnie radykalnych adhalinavańniaŭ isłama, niemahčymaść kantralavać hranicy robiać hetuju krainu ŭraźlivaj pierad džychadysckimi idejami. Adyhryvajuć rolu i vysokija tempy pryrostu nasielnictva. Paśla razvału SSSR u krainie žyło trochi bolš za 5 miljonaŭ čałaviek, a ciapier — 10 miljonaŭ.
Na hetym fonie kraina stała adnym z asnoŭnych donaraŭ nizkakvalifikavanaj pracoŭnaj siły dla Rasii.
Ale paśla 22 sakavika 2024 staŭleńnie rasijskaj dziaržavy mienavita da tadžykaŭ pastrožyłasia. Rabočych z hetaj krainy palicejskija adłoŭlivali i vysyłali dadomu padčas mihracyjnych rejdaŭ, pahraničniki pačali stavić zabarony na ŭjezd u Rasiju i ŭskładniali pierasiačeńnie miažy, ułady raili biznesu zamianiać tadžykskich rabotnikaŭ mienš relihijnymi kirhizami i ŭźbiekami.
Pry ŭsim hetym rasijski rynak pracy maje patrebu ŭ pracoŭnaj sile i nie moža zamiaścić tadžykaŭ u karotki čas. Dyj nie ŭsim pracadaŭcam takaja pieraściaroha ŭ pryncypie patrebna, tamu jany praciahvajuć zaprašać na pracu hramadzian hetaj krainy.
Ujezd u Rasiju cieraz aeraport abo naziemnyja hranicy z prylehłymi krainami aznačaje dla tadžyka abaviazkovy dopyt, pravierku devajsaŭ i hetak dalej. Inšymi słovami — zabiraje šmat času i nie abiacaje 100% ujezdu ŭ Rasiju.
Pracadaŭcam niavyhadna aficyjna afarmlać tadžykaŭ, jakim dla ŭjezdu nie patrabujecca viza. Chacia lehalna znachodzicca na terytoryi Rasii jany mohuć tolki 90 sutak u hod.
Takim čynam, jak śćviardžajuć surazmoŭcy «Našaj Nivy», biaźvizavy režym Biełarusi i Rasii stvaraje mahčymaści dla tych hramadzian Tadžykistana, jakija chočuć abo praciahvajuć nielehalna pracavać u Rasii.
Pramych rejsaŭ pamiž Dušanbe i Minskam niama. Mihranty vykarystoŭvajuć maršruty ź inšych centralnaazijackich krain.
«Pa prylocie ŭ Minsk i prachodu biełaruskaj hranicy jany potym jeduć u Rasiju naziemnym transpartam, jaki arhanizoŭvaje budaŭničaja kampanija. Jość mahčymaść, pa-pieršaje, trapić da miesca raboty, pa-druhoje — zrabić heta chutčej, a ŭ samym lepšym vypadku — uvohule nie sustrecca z rasijskimi pahraničnikami. A ŭ vypadku razmovy z palicyjaj pasprabavać schavać realny dzień pryjezdu ŭ Rasiju: «Uvieś hety čas u Biełarusi pracavali, voś tolki ŭčora ŭ Maskvu pryjechali», — patłumačyŭ «Našaj Nivie» blizki da śfiery surazmoŭca.
Pry hetym surazmoŭca ŭdakładniaje, što rasijski bok, biezumoŭna, viedaje pra hetuju ščylinu. I ŭ Biełarusi, jak i ŭ Rasii, tadžyki ŭ bolšaści vypadkaŭ prachodziać cieraź śpiecsłužbista, jaki vyśviatlaje mety vizitu i sprabuje razabracca ŭ asobie čałavieka.
«Jość vypadki, kali razvaročvajuć navat u Biełarusi», — reziumuje surazmoŭca.
-
Pradstaŭnik Uzbrojenych sił: Na vajskovuju adukacyju pastupajuć i chłopcy, jakija nabirajuć 400 bałaŭ z 400 mahčymych
-
Siarhiej byŭ u Połacku bieź miesca žycharstva. Majomaści nie mieŭ nijakaj, to syn praz sud vybivaŭ chacia b baćkaŭ vajskovy zarobak
-
U Barysavie razborki za syna skončylisia panažoŭščynaj
Kamientary