Tehieran paćvierdziŭ hibiel Ali Łarydžani. Ź jaho źniščeńniem ułada ŭ Iranie moža pierajści ad fanatykaŭ da prahmatykaŭ

Pryznańnie hibieli Łarydžani adbyłosia prykładna praz 12 hadzin paśla zajavy pra heta Izraila.

Ali Łarydžani, 13 žniŭnia 2025. Fota: AP Photo / Bilal Hussein

Ułady Irana aficyjna paćvierdzili hibiel sakratara Vyšejšaj rady nacyjanalnaj biaśpieki Irana Ali Łarydžani. Pra heta paviedamlaje ahienctva Fars.

Ahienctva Tasnim udakładniaje, što razam z Łarydžani zahinuŭ jaho syn, Marteza, i načalnik achovy.

Ranicaj 17 sakavika źjaviłasia infarmacyja, što Armija abarony Izraila naniesła avijaŭdar pa kanśpiratyŭnaj kvatery ŭ Iranie, cellu jakoha staŭ sakratar Najvyšejšaj rady nacyjanalnaj biaśpieki Irana Ali Łarydžani. Razam ź im, jak paviedamlałasia, pry hetaj atacy zahinuŭ kamandujučy siłami «Basidž» Halamreza Sulejmani. Śmierć Sulejmani ŭžo taksama aficyjna paćvierdzili.

Paśla źniščeńnia ajatały Chamieniei kiraŭnik Rady biaśpieki Irana Łarydžani byŭ faktyčna samym upłyvovym čałaviekam krainy.

Paviedamleńnie ahienctva Taśnim pra hibiel Ali Łarydžani

Mienavita jon ličycca ruchavikom jadziernaj prahramy Irana, što mieła dać u ruki ajatołaŭ instrumient, z dapamohaj jakoha jany mahli b ścierci Izrail z karty śvietu.

Na Łarydžani ŭskładajuć taksama adkaznaść za biesčałaviečny rasstreł demanstrantaŭ hetaj zimoj. Tady tolki pa aficyjnych źviestkach zahinuła bolš za 3000 čałaviek, pieravažna junakoŭ i dziaŭčat.

Likvidacyja Łarydžani pakazała, što kiraŭnictva Irana pa-raniejšamu nie moža abaranić samo siabie. Jana moža stać impulsam da pierachodu ŭłady ŭ krainie ŭ ruki mienš fanatyčnych asob.

Kamientary da artykuła