Aktyŭny palityk ź idejami isłamskaj revalucyi, bolš radykalny, čym baćka. Chto taki Madžtaba Chamieniei

Adnak aficyjnaha paćvierdžańnia z Tehierana pakul niama, a ŭnutry samoha duchavienstva isnujuć zaściarohi, što publičnaje abjaŭleńnie imia pierajemnika moža zrabić jaho pieršačarhovaj metaj dla ZŠA i Izraila. Što viadoma ab Madžtabie Chamieniei i jak jaho charaktaryzujuć ekśpierty pa rehijonie — u materyjale «Novaj-Jeŭropa».

Pavodle źviestak krynic The New York Times i Iran International, Rada ekśpiertaŭ Irana — najvyšejšy orhan duchavienstva, adkazny za pryznačeńnie viarchoŭnaha lidara, — pravioŭ 2 sakavika pasiedžańnie, dzie hałoŭnym favarytam na hetu pasadu staŭ 56‑hadovy Madžtaba Chamieniei, syn zabitaha na vychadnych ajatały Ali Chamieniei.

Jak raspaviała The New York Times sa spasyłkaj na troch iranskich čynoŭnikaŭ, znajomych ź situacyjaj, duchavienstva razhladaje mahčymaść aficyjna abjavić ab novym pierajemniku, adnak adzinstva ŭ hetym pytańni niama.

Prezident ZŠA Donald Tramp na pres-kanfierencyi ŭ aŭtorak užo vykazaŭ apasieńnie, što novym kiraŭnikom Irana moža stać čałaviek, «taki ž drenny, jak i papiaredni», čaho ZŠA nie chacieli b dapuścić.

Kali Rada vybiera mienavita Madžtabu, heta budzie aznačać kančatkovuju pieramohu najbolš radykalnaha kryła režymu, ciesna źviazanaha z Korpusam vartavych isłamskaj revalucyi (KVIR), raspavioŭ u razmovie z The New York Times ekśpiert pa Iranie z Univiersiteta Džonsa Chopkinsa Vali Nasr.

Pavodle jaho mierkavańnia, heta pakaža na toje, što mienavita KVIR zaraz kantraluje situacyju ŭ krainie.

Pavodle źviestak krynic The New York Times, mienavita KVIR aktyŭna łabiravali jaho pryznačeńnie, nastojvajučy na tym, što va ŭmovach najvostraha kryzisu krainie patrebny lidar, jaki ŭžo maje dośvied kiravańnia siłavymi i vajennymi strukturami.

Kandydatura Madžtaby Chamieniei ŭ jakaści pierajemnika razhladałasia ŭžo daŭno, raspaviała ŭMaryjana Bieleńkaja, aŭtar telehram-kanała «Fałafielnaja», jaki aśviatlaje padziei Blizkaha Uschodu. Pavodle jaje słoŭ, heta było temaj šmathadovych dyskusij — nieaficyjnych, tamu što pierajemnik nikoli aficyjna nie pryznačaŭsia.

— Pryčym pieršapačatkova kazali, što hety varyjant małavierahodny, tamu što sam Chamieniei-starejšy nibyta byŭ suprać spadčynnaj pieradačy ŭłady.

Kab heta nie asacyjavałasia z šachskim Iranam, z manarchijaj (isłamskaja revalucyja 1979 hoda abviaściła stvareńnie Isłamskaj Respubliki, dzie ŭłada nie moža pieradavacca pa spadčynie, jak heta było pry manarchii; viarchoŭny lidar pavinien abiracca Savietam ekśpiertaŭ). Ale pastupova, vidać, situacyja mianiałasia, — skazała jana.

Jak raspavioŭ u razmovie z «Novaj-Jeŭropa» ŭschodaznaŭca, ekśpiert NEST Centre Rusłan Sulejmanaŭ, kali ŭłady Irana sapraŭdy pryniali takoje rašeńnie, to vidavočna: va ŭmovach źniešniaj pahrozy režym pryniaŭ rašeńnie nie mianiać kurs i praciahvać tuju palityku, jakoj prytrymlivaŭsia Chamieniei-starejšy.

— Madžtaba Chamieniei viadomy tym, što karystajecca padtrymkaj nie tolki ŭ relihijnych kołach, ale i siarod siłavikoŭ, u pieršuju čarhu ŭ Korpusie vartavych isłamskaj revalucyi.

Ź inšaha boku, u Iranie niamała tych, chto ličyć, što Madžtaba nie pavinien zajmać hetu pasadu, bo jaho pryznačeńnie, pa sutnaści, kapijuje dynastyčny pryncyp, jaki isnavaŭ pry šachu i manarchii.

Ale, znoŭ ža, uličvajučy biesprecedentnaść umoŭ, u jakich adbyvajecca tranzit ułady, mahčyma, było pryniata mienavita takoje rašeńnie, — skazaŭ surazmoŭca «Novaj-Jeŭropa».

Kazaḿ ab niejkim novym kursie, jaki budzie pryncypova adroźnivacca ad taho, što było pry Ali Chamieniei, pakul zaŭčasna, ličyć Sulejmanaŭ; prynamsi da taho času, pakul praciahvajucca bajavyja dziejańni. U cełym, pavodle jaho słoŭ, u vypadku abrańnia Madžtaby iranski režym zastajecca takim, jakim jon byŭ pry Chamieniei-starejšym.

Pry hetym jak padkreśliła Maryjana Bieleńkaja, ličycca, što Madžtaba bolš radykalny, čym jaho baćka: jon aktyŭna ŭdzielničaŭ u padaŭleńni pratestaŭ 2009 hoda, zaŭsiody byŭ ciesna źviazany z Basidžam — apałčeńniem KVIR, jakoje adyhryvaje klučavuju rolu ŭ padaŭleńni narodnych paŭstańniaŭ.

— Jon vychoŭvaŭsia ŭnutry sistemy, u sieminaryjach, rabiŭ karjeru, stanaviŭsia aktyŭnym palitykam ź idejami isłamskaj revalucyi, jakim jon, niesumnienna, vierny. Jašče jaho budzie padsiłkoŭvać pačućcio pomsty i pačućcio abaviazku ŭ adnosinach da baćki. I jon vydatna razumieje, što ciapier jon — nastupnaja mišeń, — kaža jana.

Akramia taho, jak adznačaje Bieleńkaja, Madžtaba zaŭsiody zastavaŭsia ŭ cieni i nikoli nie zajmaŭ aficyjnych palityčnych pasad, tamu jon moža apynucca «ciomnaj kotkaj». Pryčym u apošnija hady my dakładna nie viedajem, nakolki jaho baćka zachoŭvaŭ realnuju ŭładu, a nakolki Madžtaba ŭžo akazvaŭ upłyŭ na pryniaćcie rašeńniaŭ, padkreślivaje surazmoŭca «Novaj-Jeŭropa».

Ale navat kali jon sam nie stanie viarchoŭnym lidaram, jość niekalki kandydataŭ, jakija mohuć apynucca jaho staŭlenikami, adznačyła Bieleńkaja.

«Nie da baraćby za ŭładu». Chto jašče razhladajecca na pasadu Viarchoŭnaha lidara Irana

Paviedamleńni, jakija źjavilisia ŭ Iran International i The New York Times, sami pa sabie zdolnyja paŭpłyvać na situacyju ŭ Iranie, adznačaje Rusłan Sulejmanaŭ: my ž nie viedajem napeŭna, ci byŭ na samoj spravie abrany Madžtaba. I ciapier, pavodle jaho słoŭ, iranskaje kiraŭnictva akazvajecca ŭ składanaj pastcy.</p

— Kali jany abiaruć Madžtabu, heta moža vyhladać jak sastupka źniešniamu cisku, jak padyhryvańnie emihranckim ŚMI. Kali ž jany nie abiaruć jaho, to nastrojać suprać siabie tuju častku siłavoj i relihijnaj elity, jakaja chacieła bačyć jaho na hetaj pasadzie. Ale ŭ lubym vypadku, pakolki režym zaraz zmahajecca za vyžyvańnie, unutrany raskoł adychodzić na druhi płan. Im prosta nie da baraćby za ŭładu.

I navat kali viarchoŭnym lidaram sapraŭdy staŭ Madžtaba Chamieniei, jamu zaraz nie da vyśviatleńnia adnosin z kankurentami abo praciŭnikami jaho abrańnia, — kaža jon.

Na hetym fonie na pasadu viarchoŭnaha lidara taksama razhladajucca jašče dźvie alternatyŭnyja kandydatury, raspaviadaje The New York Times: heta Alireza Arafi, śviatar i pravaznaŭca, jaki ŭvachodzić u časovy pierachodny saviet z troch čałaviek, stvorany paśla hibieli ajatały Chamieniei, i Siejed Chasan Chamiejni, unuk zasnavalnika Isłamskaj respubliki, viadomy svajoj blizkaściu da adchilenaha ad ułady refarmisckaha kryła.

Akramia taho, pavodle infarmacyi arabskaha navinavaha kanała «Al-Chadat», taksama abmiarkoŭvajucca inšyja kandydatury. Siarod ich:

• Chasan Ruchani, były prezident i člen Rady ekśpiertaŭ (taho samaha orhana, jaki i budzie vybirać novaha viarchoŭnaha lidara);
• Sadek Amali Łarydžani, jaki zajmaŭ pasadu kiraŭnika sudovaj ŭłady i ŭznačalvaje Rady pa vyznačeńni palityčnaj metazhodnaści;
• Machamad Reza Chasiejni Bušechry, člen Rady ekśpiertaŭ.

Adnak da hetaha času ni adzin varyjant nie zaćvierdžany kančatkova.

• 0
• 0
• 0
• 0
• 0
• 0
• 0
• 0