Fiestyvalu Lidbeer sioleta nie budzie

Na staroncy «Lidskaha piva» ŭ Threads źjaviłasia paviedamleńnie, što tradycyjny štohadovy fiestyval Lidbeer sioleta nie adbudziecca.

«Z sumam i škadavańniem paviedamlajem, što fiestyval LIDBEER sioleta nie adbudziecca. My ščyra spadziajemsia na sustreču ŭ budučyni i budziem radyja bačyć vas na inšych fiestyvalnych placoŭkach i letnich aktyŭnaściach z «Lidskim», — napisali arhanizatary fiestyvala.

Pra pryčynu admieny kankretna pry hetym ničoha skazana nie było, arhanizatary adznačyli tolki, što 

«jak pryniata havaryć u takich vypadkach, fiestyval nie adbudziecca pa pryčynach, jakija ad nas nie zaležać».

Heta nie pieršy taki vypadak. Raniej źjavilisia paviedamleńni pra admienu sioleta fiestyvalaŭ WOSTRAU u Niaśvižy i «Soncastajańnie» ŭ Pružanach. Tam admienu arhanizatary tłumačyli tym, što paśla nabyćcia mocy pastanovaj Savieta Ministraŭ № 454 ad 22 žniŭnia 2025 hoda jany nie zmohuć pravieści fiestyval na zvykłym uzroŭni.

Heta pastanova ŭvodzić abaviazkovy dziaržaŭny rejestr arhanizataraŭ kulturna-vidoviščnych mierapryjemstvaŭ, u jakim pavinny być zarehistravanyja jurydyčnyja asoby, što pravodziać padobnyja padziei ź biełaruskimi abo zamiežnymi vykanaŭcami.

Biez uklučeńnia ŭ hety rejestr arhanizacyja mierapryjemstvaŭ z udziełam zamiežnych artystaŭ stała niezakonnaj. Arhanizatary padkreślivajuć, što ŭ novych umovach jany nie mohuć samastojna takich artystaŭ pryvozić, tamu praviadzieńnie fiestyvalu na vysokim uzroŭni stała niemahčymym.

Možna mierkavać, što ŭ Lidzie pryčyna admieny papularnaha fiestyvalu taksama moža być źviazanaja mienavita z hetym.

Kamientary da artykuła