Biełarusy raźmiatajuć kvitki na kancerty zumiera Vani Dźmitryjenki z Krasnajarska nie tolki ŭ Minsku, ale ŭ rehijonach
Kali vam bolš za 25, vy naŭrad ci čuli imia Vani Dźmitryjenki. Miž tym u krasaviku hety rasijski śpiavak jedzie ŭ Biełaruś, i kvitki na jaho raźlatajucca za hadziny. Što adbyvajecca?
Usio pačałosia 31 śniežnia 2025 hoda — tady Dźmitryjenka abviaściŭ, što ŭ krasaviku 2026‑ha vystupić u minskim Pałacy sporta. Heta nievialikaja placoŭka, tamu kvitki raźlacielisia za niekalki hadzin. U vyniku arhanizatary dadali jašče adzin kancert — ale i tudy kvitki raspradali za hadziny.
Miarkujučy pa sacsietkach, daloka nie ŭsio achvotnyja nabyli kvitki navat z druhoha razu. I biełaruskaja častka tura Dźmitryjenki pačała razrastacca. Ciapier jana ŭklučaje ŭ siabie nie adzin kancert, a ažno šeść vystupaŭ u pieryjad z 19 pa 26 krasavika: try kancerty ŭ Minsku i pa vystupie ŭ Breście, Homieli i Hrodna.
Pryčym kancert u Breście dadali ŭ prahramu tolki niekalki dzion tamu, ale kvitkoŭ na jaho ŭžo niama.
Vyhladaje, što kali b była mahčymaść, arhanizatary dadali b i kancerty ŭ inšych abłasnych centrach. Ale ž vystupy ŭ Biełarusi — častka bolš vialikaha tura Dmitryjenki, i daty inšych kancertaŭ užo raźmierkavanyja.
Ciapier fanatki śpievaka pierapradajuć u siecivie kvitki na jaho kancerty ŭ Minsku. Usio praz toje, što spačatku vystupy ŭ abłasnych centrach nie byli zapłanavanyja, i tamu šmat ludziej byli hatovyja jechać na kancert u stalicu. Ciapier, kali śpiavak pryjedzie i ŭ ich harady, sensu jechać u Minsk niama.
Nie ŭsie zadavolenyja tym, što arhanizatary nie zapłanavali zahadzia kancerty ŭ rehijonach. U Threads pišuć biełarusy, jakim praz heta daviałosia źmianiać płany:
«Staić vialikaje pytańnie: čamu ŭ Minsku prodaž adkryŭsia ŭ śniežni, a ŭ inšych haradach — u kancy lutaha?»
«Arhanizataram 0 bałaŭ, hańba, biesić».
«Čamuści arhanizatary artysta nie pakłapacilisia pra toje, kab arhanizavać tur pa Biełarusi i adrazu anansavać usio centralizavana».
Astatnija karystalniki dzielacca ŭražańniami ad ažyjatažu:
«Ludzi, jakija adchapili kvitki na Vaniu Dmitryjenka, napišycie svoj uzrost. Praŭda cikava, kolki budzie dziaciej na kancercie».
«Vania Dmitryjenka — novy Aleh Majami ŭ Biełarusi? Try solniki, tur pa abłasnych haradach i vystup na fiestyvali Belbet. Potym jašče i dzień horada?»
«Dziaŭčyna: sprabuje adchapić kvitok na kancert Vani Dmitryjenka. Žančyna: adchapiła kvitok na kancert Piatra Jałfimava».
Dla spraviadlivaści adznačym, što Dmitryjenka vystupaje nie ŭ samych vialikich załach. Naprykład, jaho nie paraŭnać z Hannaj Aści — joj taksama davodziłasia ładzić dadatkovyja kancerty ŭ Minsku, ale rabiła jana heta ŭ «Minsk-Arenie», raźličanaj na 15 tysiač hledačoŭ. Dmitryjenka ž vystupaje ŭ Pałacy sporta z 3300 miescami. Na kancertach kolkaść miescaŭ naturalnym čynam źmianšajecca.
U Breście dla śpievaka znajšoŭsia bolš vialiki zał — spartkompleks «Viktoryja» na 3740 miescaŭ. Taksama Dźmitryjenka vystupić u homielskim Pałacy sportu (2760 miescaŭ) i ŭ hrodzienskim Ladovym pałacy (2487 miescaŭ).
Vaniu Dźmitryjenku 20 hadoŭ, jon naradziŭsia ŭ Krasnajarsku. Ź dziacinstva zajmaŭsia vakałam, a ŭ padletkavym uzroście zavioŭ tyktok, kudy vykładaŭ zapisy z kavierami na viadomyja pieśni.
U kancy 2020‑ha chłopiec vykłaŭ u tyktok videa z vykanańniem ułasnaj pieśni «Vieniera-Jupiter», i rolik zavirusiŭsia. Usiaho praz paru miesiacaŭ Dźmitryjenka, jakomu tady było 15 hadoŭ, užo vystupaŭ z solnym kancertam u Maskvie.
U 2021‑m Dźmitryjenka, pavodle danych Apple Music, zaniaŭ treciaje miesca pa papularnaści ŭ Rasii i z taho času skaraje rasijskija čarty i muzyčnyja premii.
Chłopiec nikoli adkryta nie vykazvaŭsia pra vajnu, ale pa jaho ŭčynkach usio ž možna prasačyć pazicyju.
U 2022-m, praz čatyry dni paśla pačatku paŭnamaštabnaj vajny, Dźmitryjenka admoviŭsia vychodzić na scenu premii «Žara Media Awards», dzie musiŭ być viadučym. U instahramie chłopiec napisaŭ, što jaho maralny kompas «nie dazvalaje jamu vychodzić na scenu i rabić vyhlad, što ničoha nie adbyvajecca».
Viadoma, ciapier jon chodzić na premii i atrymlivaje tam uznaharody: naprykład, u 2025‑m zaśviaciŭsia na ŭznaharodžańniach «Jandeks Muzyki». U tym ža hodzie Dźmitryjenka vystupiŭ na forumie ŭralskaj moładzi, jaki prachodziŭ pry padtrymcy ŭdzielnika rasijskaha ŭvarvańnia Arcioma Žohi.
«Naša Niva» — bastyjon biełaruščyny
PADTRYMAĆCiapier čytajuć
Minski školnik praspaŭ prypynak. Ale kiroŭca aŭtobusa davioz jaho dadomu!2
Minski školnik praspaŭ prypynak. Ale kiroŭca aŭtobusa davioz jaho dadomu!
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2424
Kamientary
. Ciahaj Škłoŭski dalej nas pa pustečy z hetym pakaleńniam ničoha nie budzie putnaha.