Saudaŭskaja Aravija i AAE prosiać Trampa nie spyniacca ź Iranam

Pavodle infarmacyi vydańnia The Wall Street Journal, krainy Piersidskaha zaliva niepakojacca, što mirnaja damova pakinie Iran dastatkova mocnym i niebiaśpiečnym susiedam. Tamu jany pierakonvajuć Donalda Trampa praciahvać vajennyja dziejańni, pakul Iran nie budzie značna asłableny.

Prezident ZŠA Donald Tramp i naśledny prync Saudaŭskaj Aravii Muchamied ibn Sałman Al Saud. Zdymak ilustracyjny. Fota: AP Photo/Mark Schiefelbein

Saudaŭskuju Araviju i AAE nie zadavalniaje prapanavany ZŠA płan urehulavańnia, jaki praduhledžvaje spynieńnie kanfliktu i źniaćcie sankcyj u abmien na sastupki z boku Irana. U Er-Ryjadzie i Abu-Dabi ličać, što heta moža dazvolić Iranu zachavać kantrol nad ekspartam enierharesursaŭ u rehijonie.

Asablivuju tryvohu vyklikaje situacyja vakoł Armuzskaha praliva, jaki Iran faktyčna zabłakavaŭ. Praź jaho raniej prachodziła značnaja častka suśvietnych pastavak nafty i hazu. Ciapier Tehieran nie tolki imkniecca zachavać kantrol nad hetym šlacham, ale i ŭžo pačaŭ brać płatu za prachod sudnaŭ.

Pry hetym patrabavańni bakoŭ istotna adroźnivajucca. ZŠA, u pryvatnaści, patrabujuć ad Irana admovicca ad jadziernaj i rakietnaj prahram, harantavać svabodnaje sudnachodstva i spynić padtrymku ŭzbrojenych hrup u rehijonie. Iran u adkaz choča poŭnaha źniaćcia sankcyj, vypłat kampiensacyj, zakryćcia amierykanskich baz i prava praciahvać svaje vajskovyja prahramy.

Na fonie hetaha Turcyja aktyŭna sprabuje dabicca spynieńnia kanfliktu dypłamatyčnym šlacham. Jana zaklikaje krainy rehijonu nie ŭciahvacca ŭ vajnu i prajaŭlać strymanaść, kab nie dapuścić jaje pierarastańnia ŭ doŭhaterminovaje supraćstajańnie.

Kamientary da artykuła