U Jeŭrasajuzie abmiarkoŭvajuć źmieny sistemy hałasavańnia, kali na vybarach u Vienhryi znoŭ pieramoža Orban

Pavodle infarmacyi vydańnia Politico, u Jeŭrapiejskim sajuzie abmiarkoŭvajuć mahčymyja źmieny ŭ sistemie hałasavańnia, kali pa vynikach hałasavańnia na parłamienckich vybarach u Vienhryi ŭładu zachavaje ciapierašni premjer-ministr Viktar Orban.

Premjer-ministr Vienhryi Viktar Orban. Fota: AP

Takija idei ŭźnikli z-za taho, što Vienhryja dahetul nieadnarazova błakavała abo zaciahvała pryniaćcie rašeńniaŭ u ES. U pryvatnaści, apošnim časam jana zabłakavała ŭviadzieńnie novaha pakieta sankcyj suprać Rasii i vydzialeńnie finansavaj dapamohi Ukrainie.

Siarod prapanavanych varyjantaŭ novaj sistemy:

• pašyreńnie hałasavańnia kvalifikavanaj bolšaściu, pry jakoj nie patrabujecca adnahałosnaść;
• stvareńnie «kaalicyj achvotnych», kali hrupa krain moža dziejničać asobna;
• abmiežavańnie abo spynieńnie finansavańnia dla krain, jakija parušajuć ahulnyja praviły;
• u krajnim vypadku — pazbaŭleńnie krainy prava hołasu.

Prezident Jeŭrapiejskaj rady Antoniu Košta padkreśliŭ, što nichto nie pavinien šantažavać instytuty ES. U svaju čarhu, pradstaŭnik Jeŭrakamisii Majkł Makhrat adznačyŭ, što dostup da finansavańnia zaležyć ad zachavańnia pryncypaŭ pravavoj dziaržavy.

Raniej staršynia Jeŭrakamisii Ursuła fon der Lajen taksama dapuskała vykarystańnie bolš hnutkich farmataŭ supracoŭnictva, kab abychodzić patrabavańnie adnahałosnaści.

Pry hetym pytańnie vyklučeńnia Vienhryi ź ES surjozna nie razhladajecca.

Parłamienckija vybary ŭ hetaj krainie zapłanavanyja na 12 krasavika, pavodle sacyjałahičnych apytańniaŭ kiroŭnaja partyja «Fides» pakul sastupaje apazicyjnaj partyi «Cisa».

Kamientary da artykuła