Ruhinienie: Dla pieramoŭ ź Biełaruśsiu ŭžo navat pryznačany čałaviek

Premjer-ministarka Litvy Inha Ruhinienie zajaviła, što dla mahčymaj sustrečy z pradstaŭnikami Biełarusi ŭžo pryznačany adkazny pradstaŭnik. U toj ža čas jana padkreśliła, što takaja sustreča mahčymaja tolki pry vykanańni peŭnych umoŭ ź biełaruskaha boku, paviedamlaje LRT.

Inha Ruhinienie. Fota: AP Photo/Ebrahim Noroozi

«My, biezumoŭna, mahli b pravieści hetuju sustreču, u nas jość adkazny čałaviek, pryznačany dla hetaha, ale my vyrazna pasłali sihnał jak našym stratehičnym partnioram, tak i ŭsiamu hramadstvu, što my majem i peŭnyja ŭmovy. Nie moža być tak, što adzin bok rychtujecca, a druhi bok ničoha nie robić», — cytuje Ruhinienie LRT.

Siarod asnoŭnych patrabavańniaŭ — spynieńnie pieralotaŭ praź miažu pavietranych šaroŭ, jakija vykarystoŭvajucca dla kantrabandy, viartańnie zatrymanych hruzavikoŭ biez dadatkovych vypłat, a taksama niedapuščeńnie nielehalnaj mihracyi.

Ruhinijenie adznačyła, što biez vykanańnia hetych umoŭ ruchu napierad nie budzie, i Litva nie bačyć dastatkovaj hatoŭnaści da supracoŭnictva z boku Minska.

Raniej pradstaŭnik prezidenta ZŠA Džon Koŭł prapanoŭvaŭ arhanizavać sustreču biez papiarednich umoŭ i adnavić tranzit uhnajeńniaŭ praź Litvu. Ale litoŭski bok padkreśliŭ, što ZŠA nie nastojvajuć na hetym pytańni, a tamu abmiarkoŭvać jaho pakul rana.

Taksama adznačajecca, što palityčny dyjałoh pamiž krainami mahčymy tolki ŭ vypadku, kali Biełaruś prademanstruje bolš dobrazyčlivyja dziejańni.

Kamientary da artykuła