Premjer Litvy: Možna razhledzieć sustreču ź Biełaruśsiu na ŭzroŭni vice-ministraŭ, ale ŭ Vilni jość umovy
Inha Ruhinienie zaznačaje, što jana nie abmiarkoŭvała tranzit biełaruskaha kaliju.
Premjerka Litvy Inha Ruhinienie zajaviła, što Litva razhledzieć prapanovu Džona Koŭła pravieści sustreču ź Biełaruśsiu na ŭzroŭni vice-ministraŭ, adnak dla hetaha isnujuć niekalki ŭmoŭ, paviedamlaje LRT.
Pry hetym kiraŭnik litoŭskaha ŭrada padkreśliła, što z amierykanskim pasłańnikam jana nie abmiarkoŭvała tranzit biełaruskich uhnajeńniaŭ — dla hetaha niama ŭmoŭ, bo zaraz dziejničajuć sankcyi Jeŭrapiejskaha sajuza.
«Z pasłańnikam ZŠA ni na jakim uzroŭni nie razmaŭlali pra tranzit uhnajeńniaŭ praź Litvu. My havaryli pra šary, pra viartańnie hruzavikoŭ, pra niezakonnuju mihracyju — pra heta my sapraŭdy razmaŭlali, bo heta našy ŭmovy dla sustrečy ź Biełaruśsiu na ŭzroŭni vice-ministraŭ», — skazała premjer I. Ruhinienie partału LRT.lt.
Pa słovach premjer-ministra, Litva vystaŭlaje Biełarusi nastupnyja ŭmovy: pa-pieršaje, praź miažu nie pavinny prachodzić šary, jakija vykarystoŭvajucca dla kantrabandy; pa-druhoje, usie hruzaviki pavinny być viernutyja bieź jakich-niebudź dadatkovych zboraŭ ci finansavych štrafaŭ; pa-treciaje, Biełaruś pavinna nie dapuskać niezakonnych mihrantaŭ praź miažu.
«My havorym tolki pra sustreču techničnaha charaktaru, pryznačanuju dla abmienu pazicyjami. Takaja sustreča moža adbycca paśla vykanańnia hetych umoŭ», — skazała premjer.
I. Ruhinienie padkreśliła, što choć kolkaść šaroŭ, jakija pieralatajuć praź miažu, krychu skaraciłasia, heta adbyłosia taksama dziakujučy aktyŭnaj baraćbie Litvy z kantrabandaj. Miž tym u čaćvier uviečary rabota Vilenskaha aeraporta znoŭ była prypynienaja na hadzinu.
Biełaruś taksama vypuściła ŭ Litvu častku hruzavikoŭ, jakija byli zatrymanyja, adnak pry hetym patrabuje ad pieravozčykaŭ apłacić ich stajanku na placoŭkach.
«Što tyčycca ŭhnajeńniaŭ, my ničoha nie možam abmiarkoŭvać, bo zaraz dziejničajuć sankcyi Jeŭrapiejskaha sajuza», — zajaviła premjer.
Toj samy masažyst raskazaŭ, navošta zdymaŭ hołych klijentak2
Kamientary