ŚMI: Pry ŭdary pa tankiery rasijskaha «cieniavoha fłotu» zahinuŭ hienierał HRU, jaki kuryravaŭ dyviersii i zabojstvy za miažoj

U vyniku ataki na tankier rasijskaha «cieniavoha fłotu» Qendil u śniežni 2025 hoda zahinuŭ hienierał Hałoŭnaha raźviedvalnaha ŭpraŭleńnia (HRU) Rasii Andrej Aviarjanaŭ, jaki adkazvaŭ za dyviersii i zabojstvy za miažoj. Pra heta paviedamlaje francuzskaja radyjostancyja RFI sa spasyłkaj na infarmavanyja krynicy, piša The Moscow Times.

Andrej Aviarjanaŭ (źleva)

Pavodle źviestak žurnalistaŭ, za apieracyjaj mahli stajać ukrainskija vajskoŭcy, jakija dziejničajuć z terytoryi Livii ŭ kaardynacyi z aficyjnym Trypali. Na borcie tankiera, akramia ekipaža, znachodzilisia kala dziesiaci vysokapastaŭlenych supracoŭnikaŭ rasijskaj raźviedki, pieraapranutych u marakoŭ.

«Heta najlepšy sposab pierasoŭvańnia dla rasijskaha raźviedčyka», — patłumačyła adna z krynic.

U vyniku ŭdaru zahinuli dva čałavieki, siem atrymali ranieńni. Siarod zahinułych byŭ Aviarjanaŭ. Aficyjna Maskva hetuju infarmacyju nie kamientavała.

Surazmoŭcy RFI adznačajuć, što nieŭzabavie paśla incydentu byŭ i adkaz: 23 śniežnia ŭ Turcyi paciarpieŭ krušeńnie samalot načalnika Hienštaba Livii hienierała Muchamieda al-Chadada. Pavodle źviestak krynic radyjostancyi, pryčynaj staŭ vybuch na borcie, i da zdareńnia moža być datyčnaja Rasija, adnak aficyjnych paćviardžeńniaŭ hetamu niama.

Jašče adzin incydent adbyŭsia 19 sakavika, kali na najbujniejšym livijskim naftavym radoviščy El-Šarara ŭspychnuŭ pažar na trubapravodzie. Na miescy byli vyjaŭlenyja rasijskija bojeprypasy, ale ŭłady Livii pakul nie rabili aficyjnych zajaŭ pra vinavatych.

Viadomy rasśledavalnik Chrysta Hrozieŭ, adnak, ličyć infarmacyju pra śmierć Aviarjanava fejkam.

Andrej Aviarjanaŭ naradziŭsia ŭ 1966 hodzie ŭ Turkmienistanie, skončyŭ Taškienckaje vyšejšaje ahulnavajskovaje kamandnaje vučylišča.

U 2013 hodzie, jak pisała «Radyjo Svaboda», jon uznačaliŭ sakretnuju vajskovuju čaść 29155, jakaja adkazvała za apieracyi HRU ŭ Jeŭropie. The New York Times sa spasyłkaj na źviestki zachodnich raźviedak pisała, što hetaje padraździaleńnie, siarod inšaha, datyčnaje da atručvańnia Siarhieja Skrypala i jaho dački ŭ Vialikabrytanii, zamachu na bałharskaha biznesmiena Amialana Hiebrava i sproby pieravarotu ŭ Čarnahoryi ŭ 2016 hodzie.

Pavodle źviestak rasśledavańnia The Insider, Aviarjanaŭ udzielničaŭ u arhanizacyi vybuchaŭ na składach bojeprypasaŭ u Bałharyi i Čechii. U 2024 hodzie jon byŭ abvieščany ŭ vyšuk češskaj palicyjaj pa spravie ab vybuchach u Vrbiecicy.

U apošnija hady jon zajmaŭ pasadu namieśnika načalnika HRU i kuryravaŭ afrykanski kirunak, a taksama, pavodle źviestak RFI, pavinien byŭ uznačalić stvorany Minabarony Rasii «afrykanski korpus» paśla rasfarmavańnia PVK «Vahnier».

Jak vyśvietliła RFI, Ukraina ŭ 2025 hodzie razharnuła vajskovuju prysutnaść u Livii pa ŭzhadnieńni z uradam Abdel Chamida Dbiejby. Pavodle źviestak krynic, u krainie raźmieščanyja bolš za 200 ukrainskich śpiecyjalistaŭ, jakija pracujuć na niekalkich abjektach, uklučajučy avijabazu ŭ Misracie i infrastrukturu dla zapusku marskich i pavietranych bieśpiłotnikaŭ u rajonie Mielity. Z hetych pazicyj, jak śćviardžajecca, ažyćciaŭlalisia ataki na rasijskija sudny ŭ Mižziemnym mory, uklučajučy ŭdar pa Qendil i pa hazavozie Arctic Metagaz.

Kamientary da artykuła