Vosiem aficeraŭ HRU mohuć być datyčnyja da sproby atručvańnia bałharskaha zbrojnika
Vosiem aficeraŭ rasijskaha HRU imavierna datyčnyja da sproby atručvańnia bałharskaha zbrojnika Amialana Hiebrava z dapamohaj jadu Navičok u krasaviku 2015 hoda, paviedamlajecca ŭ rasśledavańni Bellingcat, The Insider i Der Spiegel.
Padčas mierkavanaha atručvańnia biznesmiena Hiebrava ŭ Bałharyi znachodziŭsia hienierał-major Dzianis Siarhiejeŭ (psieŭdanim — Siarhiej Fiadotaŭ). Jon taksama fihuruje ŭ spravie ab atručvańni ŭ brytanskim Sołśbiery byłoha aficera HRU Siarhieja Skrypala i jaho dački Julii.
Usiaho ŭ apieracyi ŭ Bałharyi ŭdzielničali jašče nie mienš za siem supracoŭnikaŭ HRU: Siarhiej Lucienka (Siarhiej Paŭłaŭ), Piotr Barysaŭ (Hieorhij Harškoŭ), Ivan Ciarenćjeŭ (Ivan Lebiedzieŭ), Mikałaj Jažoŭ (Mikałaj Kananychin), Alaksiej Kalinin (Alaksiej Nikicin), Daniił Kaprałaŭ (Daniił Ściapanaŭ) i Uładzimir Maisiejeŭ (Uładzimir Papoŭ). Apošni moža taksama być klučavym arhanizataram niaŭdałaha dziaržaŭnaha pieravarotu ŭ Čarnahoryi.
Realnyja imiony aficeraŭ HRU ŭstanavili z dapamohaj danych ich zamiežnych pašpartoŭ, a taksama padčas paraŭnańnia fatahrafij u rasijskich bazach danych sa zdymkami, jakija tyja rabili dla padačy dakumientaŭ na šenhienskuju vizu.
Pryčyna atručvańnia Hiebrava pakul što dakładna nie jasnaja navat dla samoj achviary.
Pa słovach samoha Hiebrava, jon pastaŭlaŭ uzbrajeńni Hruzii padčas vajennych dziejańniaŭ 2008 hoda, ale jaho zbroja składała nie bolš za 10 pracentaŭ ad bałharskich pastavak hetaj krainie. Jon taksama śćviardžaje, što ni prama, ni ŭskosna nie pastaŭlaŭ zbroju va Ukrainu paśla pačatku kanfliktu z Rasijaj u 2014 hodzie.
U 2015 hodzie Hiebraŭ byŭ špitalizavany, paśla taho jak straciŭ prytomnaść na pryjomie, jaki jon ładziŭ u Safii. Prykładna ŭ toj ža čas drenna siabie adčuli syn Hiebrava i adzin z top-mieniedžaraŭ jaho kampanii. Usich troch špitalizavali ź simptomami ciažkaha atručvańnia.
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary