Rasijskija śpiecsłužby stvaryli novaje padraździaleńnie dla baraćby z Zachadam
Novaje padraździaleńnie rasijskich śpiecsłužbaŭ-Departamient śpiecyjalnych zadač — źjaviłasia ŭ Rasii ŭ 2023 hodzie ŭ adkaz na padtrymku Ukrainy krainami Zachadu. Zadačaj hetaha padraździaleńnia stali tajemnyja apieracyi suprać Zachadu, kažuć krynicy The Wall Street Journal.
Departamient staić za šeraham napadaŭ na Zachad, u tym liku płanavanym zamacham na hienieralnaha dyrektara niamieckaha vytvorcy zbroi Rheinmetall Armina Papierhiera i ŭzharańniem pasyłak u łahistyčnych centrach DHL, piša «Ahienctva».
Departamient mieścicca ŭ štab-kvatery HRU. Jon uziaŭ na siabie niekatoryja funkcyi FSB i pahłynuŭ vajskovuju častku 29155 — padraździaleńnie HRU, jakoje ličycca adkaznym za atručeńnie Siarhieja Skrypala ŭ Vialikabrytanii ŭ 2018 hodzie.
Departamient, jak kažuć krynicy WSJ ŭ zachodnich raźviedkach, maje jak minimum try asnoŭnyja zadačy: zabojstvy i dyviersii za miažoj, praniknieńnie ŭ zachodnija kampanii i univiersitety i viarboŭka zamiežnych ahientaŭ.
Departamient viarbuje ahientaŭ z Ukrainy, krain, što raźvivajucca, a taksama dziaržaŭ, jakija ličacca družalubnymi Rasii (naprykład, Sierbii). Departamient taksama kiruje elitnym centram śpiecyjalnych apieracyj, viadomym jak «Sieniež» (v/č 92154).
Asablivuju ŭvahu Departamient nadaje Hiermanii. Maskva razhladaje hetuju krainu jak słaboje źviano ŭ NATA praz zaležnaść ad rasijskich enierhanośbitaŭ, rostam zaniepakojenaści z nahody jadziernaj eskałacyi i simpatyj da Rasii siarod niekatorych palitykaŭ i vybarščykaŭ.
Kiruje Departamientam hienierał Andrej Aviarjanaŭ. Raniej jon uznačalvaŭ vajskovuju častku 29155 HRU i, jak pisaŭ The Insider, da 2023 hoda staŭ namieśnikam načalnika HRU, jaki kuryruje vajennyja i hibrydnyja apieracyi ŭ Afrycy, Azii i na Blizkim Uschodzie.
Jaho namieśnik na pasadzie kiraŭnika novaha Departamentu-hienerał-lejtenant Ivan Kaśjanienka, jaki, na dumku zachodnich śpiecsłužbaŭ, kaardynavaŭ aperacyju pa atručvańni Skrypala. Jon kiruje tajemnymi apieracyjami ŭ Jeŭropie i adkazvaje za pierachop kantrolu nad afrykanskimi strukturami «PVK Vahniera» paśla śmierci Jaŭhiena Pryhožyna.
Dziejnaść departamienta dasiahnuła piku letam 2024 hoda i apošnim časam pajšła na spad, skazali haziecie krynicy siarod čynoŭnikaŭ u ZŠA i Jeŭropie. Skaračeńnie apieracyj moža być źviazana sa sprobaj Rasii stvaryć prastoru dla pieramovaŭ z novaj amierykanskaj administracyjaj, kažuć dva surazmoŭcy WSJ ź liku kiraŭnikoŭ raźviedak krain Jeŭropy.
Ciapier čytajuć
Pamiatajecie paru studentki i vykładčyka, dzie jon starejšy na 31 hod? Akazvajecca, jon byŭ śviatarom, a jana vučyłasia na rehientku3
Kamientary