«Prabačcie mnie, daśledčyki, za ŭsio». Fiodar Paŭlučenka adkazaŭ Uładzisłavu Čachoviču
Fiodar Paŭlučenka i Alaksandr Atroščankaŭ, viadučyja tok-šou «Saša, što ty niasieš», aburylisia pazicyjaj daśledčykaŭ, jakija krytykavali akcyju «Kibierpartyzanaŭ» pa ŭzłomie sajta Nacbiblijateki. Architektar Uładzisłaŭ Čachovič za heta ich vyściebaŭ na svajoj staroncy ŭ fejsbuku, što Fiodar Paŭlučenka, u svaju čarhu, taksama nie pakinuŭ biez uvahi.
Nacyjanalnaja biblijateka ŭviečary. Fota: travel4us.ru
Fiodar Paŭlučenka arhumientuje svoj padychod:
«Składana było nie pravieści anałohii z aktyvistami, jakija ŭ Minsku pisali na ścienach palityčnyja hrafici, a nieabyjakavyja žychary abvinavačvali ich u vandaliźmie. Dla siabie hetuju składanuju maralnuju dylemu ja vyrašyŭ daŭno — u krainie, dzie zabivajuć palityčnych apanientaŭ, ścieny mohuć i paciarpieć. Pra heta my i parazvažali ŭ efiry.
Mnie ŭvohule vielmi niablizkaja łohika, pavodle jakoj represii ŭ Biełarusi adbyvajucca tamu, što Kaleśnikava prapanoŭvała «dziaŭbci», a Cichanoŭskaja navažyłasia pajści na vybary zamiest svajho muža. Nie padabajecca mnie i łozunh «Nie złavać dzieda».
Kali mianie ŭ pačatku 2000‑ch «vypilvali» z aśpirantury z-za taho, što ja pracavaŭ u «Chartyi'97», kalehi z kafiedry kazali mnie: «Nu ty ž usio razumieješ». A adzin navat napisaŭ danos. Nie razumieŭ hetaha ja tady, nie razumieju i ciapier. Darečy, tak maja karjera daśledčyka i skončyłasia.
Davajcie paŭtaru hety nieskładany tezis jašče raz i vielmi spadziajusia, što adukavanyja razvažlivyja ludzi mianie zrazumiejuć: katałoh adklučyŭ i sajt Nacbiblijateki zakryŭ Hihin i kampanija, a nie «Kibierpartyzany».
Kali Čachoviču i Biesarabu [navukoviec-chimik Siarhiej Biesarab, jaki ŭ kamientarach da pasta Čachoviča nazvaŭ razvažańni Fiodara Paŭlučenki «dzikunstvam» — Red.] zručna vymieścić kryŭdu i złość na mnie abo «Kibierpartyzanach», ja zrazumieju, ale nie prynižajcie siabie vyčvarnaj łohikaj, sprabujučy abvinavacić mianie ŭ svaich prablemach.
Hety błok ja pišu dla tych, chto pračytaŭ post Čachoviča. Spadar Čachovič schłusiŭ.
- Ja nie ŭžyvaŭ słova «daśledčyk», kab prynizić biełaruskamoŭnych. Bazavy tekst, jaki byŭ u mianie pierad vačyma padčas efiru, byŭ napisany pa-biełarusku, i ja nie zmoh adrazu ŭspomnić ruski adpaviednik.
- Adziny dziaržrehistr jurydyčnych asob i IP, raskłady sudoŭ, sudovyja rašeńni na Pravo.by i mnohija inšyja karysnyja servisy niedastupnyja z-za miažy, ale mnie chapaje rozumu i sumleńnia nie vinavacić u hetym Ukrainu i «Kibierpartyzanaŭ». Mnohija dziaržaŭnyja sajty zakrylisia paśla pačatku vajny z-za atak ukrainskich chakieraŭ.
- Ja ź vialikaj pavahaj staŭlusia da ludziej navuki. Prabačcie mnie, daśledčyki, za ŭsio, kali chtości z vas pryniaŭ našyja razvažańni na svoj rachunak. Mnie nie padabajucca tolki durni. Mienavita im byli adrasavanyja našy niepalitkarektnyja słovy».