Polskim katalickim śviataram mahli zabaranić słužyć u Biełarusi za spryjańnie hreka-katalikam

Paśla naviny pra toje, što ŭ Bresckaj vobłaści ŭsie hreka-katalickija parafii byli pazbaŭlenyja dziaržaŭnaj rehistracyi, nijakich publičnych kamientaroŭ i zajaŭ na hety kont duchavienstva, u tym liku ijerarchaŭ, dahetul nie źjaviłasia. Ale supastaŭleńnie niekatorych faktaŭ dazvalaje rabić peŭnyja dapuščeńni, piša vydańnie Katolik.life.

Stali viadomyja niekatoryja novyja detali adnosna parafii ŭ Ivacevičach, jakuju likvidavali pieršaj. Akazałasia, heta adbyłosia pa rašeńni Bresckaha abłasnoha suda — takaja infarmacyja ŭtrymlivajecca ŭ dziaržaŭnym rejestry. Heta moža aznačać, što supolnaść nie padavała zajavu ab likvidacyi i nie była zhodnaja z tym, što nie prajšła pierarehistracyju. Praz sud taksama byli likvidavanyja parafii ŭ Baranavičach i Breście.

Pavodle mierkavańniaŭ u katalickaj supolnaści Biełarusi, mienavita hreka-kataliki Brestčyny byli najbolš šmatlikimi i aktyŭnymi, tamu pazbaŭleńnie ich rehistracyi vyklikaje jašče bolš pytańniaŭ.

Taksama zaŭvažanaja detal z žyćcia ryma-katalickaj parafii ŭ Ivacevičach, dzie niadaŭna probašču, polskamu ksiandzu Adamu Stračynskamu ŭłady nie dali dazvoł na praciah słužeńnia i jon vymušana pakinuŭ Biełaruś razam ź jašče adnym polskim śviatarom.

Z pačatku hodu, paśla likvidacyi parafii hreka-katolikaŭ u Ivacevičach, jaje śviatar udzielničaŭ u praviadzieńni ryma-katalickich nabaženstvaŭ u miascovym kaściole. Heta vidać na fota parafii. Nastupnymi stali zdymki z raźvitańnia z polskim probaščam, i z taho času hreka-katalicki śviatar bolš nie byŭ zaŭvažany na zdymkach z kaścioła.

Tamu vierniki zrabili vysnovu, što vierahodnaj padstavaj dla pazbaŭleńnia polskaha śviatara dazvołu na słužeńnie mahło stać toje, što jon zaprašaŭ da słužeńnia ŭ kaściole hreka-katalickaha śviatara likvidavanaj parafii.

Choć ničoha supraćzakonnaha ŭ hetym niama i takaja praktyka, kali hreka-katalickija śviatary ŭdzielničajuć u śviatych nabaženstvach razam z ryma-katolikami, źjaŭlajecca raspaŭsiudžanaj.

Sami likvidavanyja supolnaści taksama praciahvajuć zachoŭvać maŭčańnie.

Kamientary da artykuła