U Viarchoŭnym sudzie Biełarusi 9 krasavika prajšło pasiadžeńnie pa razhladzie skarhi hreka-katalickaj parafii ŭ Breście na rašeńnie Bresckaha abłasnoha suda ab likvidacyi parafii. Na žal, skarhu nie zadavolili — pryniata kančatkovaje rašeńnie ab pazbaŭleńni supolnaści rehistracyi jak relihijnaj arhanizacyi, piša Katolik.life.
Pra heta daviedalisia vierniki, ale ni struktury Katalickaj carkvy, ni dziaržaŭnyja orhany nie paviedamlali pra likvidacyju parafii Śviatych Bratoŭ Apostałaŭ Piatra i Andreja ŭ Breście.
Bolš za toje, rašeńniem miascovych uładaŭ była likvidavanaja taksama hreka-katalickaja parafija Śviatych Kiryły i Miafodzija ŭ Baranavičach. Razam z parafijaj u Ivacevičach, jakaja raniej nie prajšła pierarehistracyju, ahułam likvidavanyja ŭsie try relihijnyja arhanizacyi hreka-katalikoŭ (unijataŭ) u Bresckaj vobłaści.
Situacyja supolnaściaŭ u Breście i Baranavičach asablivaja. Kali parafija ŭ Ivacevičach, jak i mnohija ryma-katalickija supolnaści, nie prajšła pierarehistracyju ŭ 2025 hodzie i padała zajavu ab likvidacyi arhanizacyi, to ŭ hetym vypadku praces likvidacyi adbyvaŭsia praz sud.
Padrabiaznaści viernikam nie viadomyja. Ale vyhladaje tak, što supolnaści byli niazhodnyja ź likvidacyjaj, tamu takija rašeńni pryniali miascovyja ŭłady, a vierniki abskardžvali hetyja rašeńni ŭ sudzie.
Dakładnaja aficyjnaja pryčyna likvidacyi nieviadomaja, adnak u adnym z rašeńniaŭ vierniki zaŭvažyli farmuloŭku pra byccam by «pahrozu nacyjanalnym intaresam».
Skarhu padavała i parafija ŭ Baranavičach, ale vynik viernikam nieviadomy — chutčej za ŭsio, taksama była atrymanaja admova. Ciapier supolnaść udzielničaje ŭ ryma-katalickich imšach u kaściole.
Paśla likvidacyi arhanizacyj hreka-katoliki nie mohuć arhanizoŭvać słužby ŭ vizantyjskim abradzie i źbiracca samastojna na malitvu ŭ svaich chramach. Pytańnie z majomaściu parafij pakul vyrašajecca — vierahodna, daviadziecca rehistravać budynki chramaŭ na pryvatnych asobaŭ.
Nakolki viadoma viernikam, hreka-kataliki Bresckaj vobłaści spadziajucca, što budzie dasiahnuta damoŭlenaść słužyć liturhii ŭ vizantyjskim abradzie ŭ miascovych katalickich chramach. I nie stračvajuć nadzieju, što ŭ budučyni zmohuć nanoŭ zarehistravać parafii.
Admietna, što takija pracesy adbylisia pry novym Apostalskim nuncyju (dypłamatyčnym pradstaŭniku) Vatykana ŭ Biełarusi arcybiskupie Ińjacyjo Čefalia (na hałoŭnym fota), jaki sam źjaŭlajecca hreka-katolikam — śviatarom vizantyjskaha abradu Itała-ałbanskaj Katalickaj carkvy.
U Mahiloŭskaj vobłaści paśla pierarehistracyi źnikła pałova katalickich parafij
U kancy XVIII stahodździa hreka-katalictva ŭ Biełarusi sprabavała płaŭna pieraciačy ŭ łacinstva
Pieršymi biełarusami, jakija sustrelisia z novym Papam, stała delehacyja hreka-katolikaŭ
«Boh daŭ vam usio, akramia majho numara telefona»: śviatar-unijat ź Viciebska staŭ zorkaj sacsietak
Kamientary
[Zredahavana]