Homielskaha taksista asudzili da kałonii pa troch palityčnych artykułach

Illa Karpaŭ z Homiela zajmaŭsia vytvorčaściu mebli na zakaz i padpracoŭvaŭ taksistam. Ale niadaŭna 33‑hadovaha mužčynu pasadzili za palityku.

Illa Karpaŭ. Fota ź jahonaj staronki Ukantakcie

Illi Karpavu 33 hady. Miarkujučy pa sacsietkach, jon rodam z Buda-Kašaloŭskaha rajona, ale žyŭ u Homieli. Z 2018 hoda pracavaŭ jak indyvidualny pradprymalnik: mieŭ ułasny nievialiki biznes pa vytvorčaści piłamateryjałaŭ i rabiŭ šafy na zakaz. Akramia hetaha, mužčyna padpracoŭvaŭ taksistam u Minsku.

U miascovym čacie Illa rehularna paviedamlaŭ pra złamanyja śviatłafory, źbityja darožnyja znaki, prapanoŭvaŭ idei dla palapšeńnia ruchu i prasiŭ pastavić rehuliroŭščykaŭ na prablemnyja skryžavańni. A ŭ volny čas lubiŭ pahulać na kampjutary — u čatach žartavaŭ, što jahonaja stareńkaja videakarta jašče niešta moža pakazać.

Adnak jaho narmalnaje žyćcio pierarvaŭ palityčny pieraśled. Homielski abłasny sud vynies Illu Karpavu prysud adrazu pa troch artykułach KK. Mužčynu abvinavacili ŭ sadziejničańni ekstremizmu (č. 1 i č. 2 art. 361‑4 KK), abrazie Łukašenki (č. 1 art. 368 KK) i dyskredytacyi Biełarusi (art. 369‑1 KK).

Prysud nieviadomy, ale mužčynie pahražała da siami hadoŭ kałonii. Pa źviestkach pravaabaroncaŭ, ciapier Illa znachodzicca ŭ niavoli.

«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta. 

Kamientary da artykuła