Byłoha vajskoŭca, a ciapier elektramiechanika z Błudnia asudzili za «sadziejničańnie ekstremizmu»
Alaksandr Davidovič słužyŭ vajskoŭcam, a paśla kala 20 hadoŭ adpracavaŭ na čyhuncy. Ale niadaŭna jaho kinuli za kraty.
Alaksandru Davidoviču 47 hadoŭ. Jon rodam z-pad Biarozy, vučyŭsia ŭ škole ŭ ahraharadku Pieršamajskaja (da 1964 hoda — Błudzień) Biarozaŭskaha rajona. Paśla vypusku vučyŭsia ŭ Bresckim dziaržaŭnym kaledžy čyhunačnaha transpartu. Mužčyna žyvie ŭ Biarozie. Razam z žonkaj jany vychoŭvajuć dvaich dziaciej.
Pavodle źviestak abjadnańnia Belpol, raniej Davidovič byŭ vajskoŭcam. U bazach jość zapis pra toje, što jon słužyŭ u vajskovaj čaści № 55782, 927‑aj źniščalnaj avijabazie VPS u Biarozie.
Svajo dalejšaje žyćcio Alaksandr źviazaŭ ź Biełaruskaj čyhunkaj — apošni zapis u bazach pra vajskovuju čaść datujecca 2007 hodam. Jon doŭhi čas pracavaŭ u Bresckaj dystancyi sihnalizacyi i suviazi (ŠČ-6), dzie daros da elektramiechanika. U vieraśni 2024 hoda jon naviedvaŭ kursy pavyšeńnia kvalifikacyi ŭ Biełaruskim dziaržaŭnym univiersitecie transpartu.
Alaksandra zatrymali ŭ minułym hodzie. Jaho asudzili pa abvinavačańni ŭ «sadziejničańni ekstremizmu» (č. 1 i č. 2 art. 361‑4 KK).
Miarkujučy pa tym, što jon tak nidzie i nie źjaviŭsia anłajn, jamu prysudzili kałoniju.
«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
Sprava Hajuna pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik Hajuna Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta.
«Naša Niva» — bastyjon biełaruščyny
PADTRYMAĆNatalla Kalehava raskazała pra dapamohu biełaruskim uciekačam, svaju siamju, staŭleńnie da Cichanoŭskaj. I patłumačyła, chto takija «babry» i «zajcy»34
Kamientary