«Nastaŭniki až ślaźmi zajšlisia». 400 amierykanskich vučniaŭ zaśpiavali pieśniu na biełaruskaj movie

Bolš za čatyry sotni vučniaŭ choru ŭ amierykanskim horadzie Takoma vykanali pieśniu hurta NaviBand na biełaruskaj movie. «Biełsat» parazmaŭlaŭ z arhanizatarami kancertu pra toje, jak heta atrymałasia.

Skrynšot videa vystupu

Chor Tacoma refugee choir śpiavaje ŭ horadzie Takoma (štat Vašynhton) užo dziesiać hadoŭ i składajecca ź imihrantaŭ, biežancaŭ i lubych achvotnych. Spačatku ŭ jaho ŭvachodzili 22 biežancy z hetaha horadu, potym kolkaść udzielnikaŭ vyrasła da 800 čałaviek z bolš čym 70 krain śvietu. Za čas svajho isnavańnia chor vystupiŭ dla bolš čym 50 tysiač čałaviek na hramadskich i dziaržaŭnych mierapryjemstvach pa ŭsioj Amierycy.

Adna z udzielnic choru — biełaruska Kaciaryna Marynievič — śpiavaje ŭ Tacoma refugee choir užo čatyry hady. Dziaŭčyna raskazała «Biełsatu» pra toje, jak da jaje pryjšła ideja navučyć udzielnikaŭ choru śpiavać na biełaruskaj movie.

«My śpiavajem pieśni pra tuhu pa domie na tych movach, na jakich havorać udzielniki choru. Naprykład, my śpiavali na manholskaj, vjetnamskaj, ispanskaj, suachili, tahalskaj movie. Ja ŭžo čatyry hady ŭ chory i ŭvieś hety čas nie mahła znajści pieśniu na biełaruskaj movie, jakuju my zmahli b praśpiavać usie razam. Spačatku dumała, moža być, «Kałychanku» razvučyć, ale potym zrazumieła, što ludzi chutčej pajeduć dacham, čym jaje vyvučać. A paśla vychadu apošniaha alboma NaviBand ja pačuła pieśniu Life — i heta idealna supała!»

Jakraz viasnoj minułaha hodu chor šukaŭ novuju pieśniu dla kancerta na zamiežnaj movie. U hety čas vyjšaŭ novy albom hurta NaviBand, a na im — pieršaja aptymistyčnaja pieśnia hurta z 2020 hoda.

«U toj ža viečar ja dasyłaju pieśniu na YouTube u čat našaha choru i kažu, što znajšła patrebnuju nam pieśniu. I ŭsie ŭ adkaz: «Tak-tak, vielmi kłasnaja!», a na nastupny dzień dyrektar choru kaža: «Supier, my biarom voś hetuju pieśniu». Tak my pačali razvučvać jaje choram. Pieśnia ŭsim vielmi spadabałasia, ale ŭdzielnikam choru było vielmi ciažka pramaŭlać biełaruskija słovy, choć jany vielmi staralisia», — kaža Kaciaryna.

Biełaruskamoŭnaja pieśnia Life letaś stała apošniaj na finalnym kancercie choru — jaje śpiavała ŭsia zała.

«Uvohule, hetaja pieśnia vielmi spadabałasia choru, i my atrymali vielmi dobry fidbek. Z taho času my śpiavali jaje na šmatlikich mierapryjemstvach, u tym liku pierad hubiernataram štata i na mierapryjemstvach, dzie była kanhresvumen. Pierad tym jak pačać śpiavać, ja zaŭsiody kažu pramovu i tłumaču, čamu my jaje śpiavajem. Kažu pra toje, što biełarusy ciapier znachodziacca pa ŭsim śviecie i što heta pieršaja pieśnia hurta paśla adjezdu, jakuju jany zmahli napisać aptymistyčna. Ja chaču, kab ludzi razumieli sens pieśni i toje, što Biełaruś ciapier pieražyvaje ciomnyja i strašnyja časy, ale pry hetym my ŭpeŭnienyja, što budziem praciahvać tancavać i ŭsio roŭna zastaniemsia razam. I nie było nivodnaha kancerta, kali b ludzi nie padychodzili da mianie sa ślazami na vačach i nie kazali: heta było niešta!»

Chor taksama vučyć śpievam vučniaŭ škoł u horadzie Takoma i naprykancy navučalnaha hoda robić vialiki sumiesny kancert. Nastaŭniki z vučniami ŭ 2026 hodzie taksama vybrali dla vykanańnia biełaruskamoŭnuju pieśniu.

«Hetaja pieśnia vielmi mocna zapała ŭ dušu nastaŭnikam, jany až ślaźmi zajšlisia, kali jaje pačuli, i zachacieli, kab my razvučyli jaje z vučniami. Paśla ja try miesiacy vučyła hetaj pieśni dziaciej z małodšaj, siaredniaj i starejšaj škoły. My taksama pakazvali im prezientacyju pra Biełaruś, raskazvali, čamu śpiavajem hetu pieśniu. Dzieciam jana nastolki spadabałasia, što mnohija potym padychodzili da mianie i kazali: «My nie možam pierastać jaje śpiavać».

Chor Tacoma refugee choir śpiavaje ŭ horadzie Takoma (štat Vašynhton) užo dziesiać hadoŭ i składajecca ź imihrantaŭ, biežancaŭ i inšych achvotnikaŭ. Fota: arhanizatary

Muzyki z NaviBand taksama arhanizavali z vučniami zvanok praz Zoom, dzie raskazvali pra siabie i pra toje, što ich muzyku nielha słuchać u Biełarusi. Jak i mnohija inšyja muzyki, jany znachodziacca pad zabaronaj u svajoj krainie i majuć «ekstremisckija» staronki ŭ sacsietkach, tamu navat prasłuchoŭvańnie ich piesień ułady mohuć paličyć niesankcyjanavanym pikietavańniem. Muzyki raskazali historyi pra toje, što niekatoryja školniki ŭ Biełarusi chacieli praśpiavać ich pieśni na školnych kancertach, ale im hetaha nie dazvolili. Ciapier zamiest školnikaŭ u Biełarusi pieśni na biełaruskaj movie śpiavajuć amierykanskija školniki.

«Na ździŭleńnie, u dziaciej uvohule akazałasia cudoŭnaja biełaruskaja mova i vymaŭleńnie! Dzieci sa starejšych kłasaŭ navat zachacieli śpiavać pieršy kuplet soła, i piać ci šeść čałaviek u vyniku ŭziali pa radku, a ŭsio astatniaje śpiavaŭ chor z čatyrochsot dziaciej. Uvohule, heta byŭ cudoŭny, niejki nievierahodny momant. Heta mara, pra jakuju ja navat nie advažvałasia maryć — što budu ŭ Amierycy vučyć dziaciej śpiavać na biełaruskaj movie», — kaža Kaciaryna.

Kamientary da artykuła