Najlepšyja biełaruskija treki za 2025 hod? Vy budziecie ašałomlenyja

U top hałoŭnych tvoraŭ minułaha hoda kamanda «Kliku» ŭklučyła 100 trekaŭ, i vybrać ich z usioj raznastajnaści było niaprosta.

Padborka atrymałasia maksimalna roznabakovaj: tut i małady drajvovy rep ad Łajtovaha, i ŭžo pastaleŭšy jaho kaleha Murovei, pop-rokavyja kobrynskija dramy pra kachańnie ad Passive Voice, kłasičnaja zabijackaja trasianka ad «Raźbitaha serca pacana» i duety z Palina (pieśnia «Artefakt») i Bi-2 (trek «Majo kachańnie») z apošniaha ŭdumlivaha, miełanchaličnaha i vielmi ŭtulnaha alboma «Naviband».

U topie znajšłosia miesca jak daśviedčanym artystam, tak i navičkam. Chto pryjšoŭ pasłuchać Shuma ci Maksa Karža, moža adkryć dla siabie samarodka Jana Kłapockaha ci ŭsłuchacca ŭ papularnych siońnia muzykaŭ z benda «Sny siniaha sabaki» (fantastyčnyja klipy ŭ ich). 

Maŭčym užo pra śpiavačku i mastačku Nastaśsiu Rydleŭskuju ci 21‑hadovaha Daniłu SAMOTA ź jaho zumierskim, vielmi emacyjnym mietał-koram. Jany stali sapraŭdnym adkryćciom apošniaha času.

Niekatoryja mohuć zadacca pytańniem: a navošta ŭ biełaruski top uklučyli ŁSP ci IOWA, jakija vidavočna siońnia pracujuć najpierš na rasijski rynak? Ale tut užo rašeńnie kožnaha — kaho padtrymlivać prasłuchoŭvańniem, a kaho — ihnaravać. Apuskajučy vyšejzhadany momant i abstrahujučysia ad palityčnych pytańniaŭ, nielha nie zaŭvažyć, što hetyja muzyki vydajuć jakasnyja pracy.

U pryncypie, padobnaja pretenzija moža prylacieć i da zhadki pra sumiesnuju tvorčaść Paźniaksa i Mejbi-Bejbi «Žabinka-Harodnia» (apošniaja, u žyćci Viktoryja Łysiuk, razam z pradstaŭnikom partyi ŁDPR adpraŭlała, naprykład, dapamohu dla rasijskich vajskoŭcaŭ na vajnu suprać Ukrainy). Tak ci inakš, realii takija, što ŭ ich šmat słuchačoŭ i hledačoŭ nie tolki ŭ Rasii, ale i ŭ Biełarusi.

Asobna chočacca źviarnuć uvahu na kolkaść biełaruskamoŭnych trekaŭ — ich sapraŭdy šmat. Muzyka pa-biełarusku robicca ŭ šmatlikich žanrach, tamu kožny znojdzie niešta svajo: chulihanskija rečytatyvy ad Leibonik, pop-folkavuju Nevika, techna-kaviery na «Pieśniaroŭ» ad Police in Paris, mistyčnych «Sindrom samazvanca», avant-pop ad «Sajuz», pop-rok ad Uladz ci rep ad Łajtovaha i Mandzik, a taksama bałady ad Illi Šynkarenki (tak, jon nie tolki papularny tyktokier).

I jašče adna važnaja prykmieta času, jakaja vymaloŭvajecca pry prasłuchoŭvańni hetaha topa — tut, akramia tradycyjnych moładzievych pieražyvańniaŭ i prablem, ź jakimi ludzi sutykajucca padčas staleńnia, šmat antyvajennych pasyłaŭ — make love not war — i lubovi da radzimy. Pryčym z roznych bakoŭ ad zachodniaj miažy — ci to ŭnutrybiełaruskija hurty, ci tyja, chto siońnia ŭ vymušanaj emihracyi, ale z sercami, poŭnymi nastalhii i fokusa na biełaruski kulturny kod i kantekst. Pamiž bakami niama sprečak i padziełu, a sapraŭdnaja tvorčaja jednaść i salidarnaść, i heta nie moža nie radavać u naš kryzisny palityčny čas.

• 18
• 1
• 0
• 2
• 1
• 0
• 0
• 0