U Rasii całkam zabaranili armianskuju minierałku «Džermuk»

U Rasii całkam zabaranili prodaž i ŭvoz viadomaj minieralnaj vady «Džermuk», jakuju zdabyvajuć u Armienii. Takoje rašeńnie pryniaŭ Rasspažyŭnahlad, piša «Kommiersant».

Zdymak ilustracyjny. Fota: darwin-wine.ru

Raniej, z kanca krasavika, abmiežavańni dziejničali tolki dla asobnych partyj vady z kankretnymi datami vytvorčaści. Ciapier ža zabarona raspaŭsiudžvajecca na ŭsiu pradukcyju biez vyklučeńnia. Ułady Rasii prosta zabaranili pastaŭki hetaj vady ŭ krainu.

Farmalnaja pryčyna ŭ tym, što ŭ vadzie nibyta vyjavili pieravyšeńnie ŭtrymańnia niekatorych rečyvaŭ — hidrakarbanataŭ, chłarydaŭ i sulfataŭ. Viedamstva śćviardžaje, što heta, maŭlaŭ, moža ŭvodzić ludziej u zman adnosna jaje lekavych ułaścivaściaŭ i navat škodzić zdaroŭju, kali čałaviek raźličvaje na taki efiekt.

Pra pryniataje rašeńnie paviedamili ŭ Jeŭrazijskuju ekanamičnuju kamisiju i adpaviednyja orhany inšych krain JEAES, a taksama handlovym arhanizacyjam, kab spynić raspaŭsiudžańnie pradukcyi.

Farmalna heta rašeńnie vyhladaje jak abmiežavańni pa čysta techničnych pryčynach, adnak daŭno viadoma, što sanitarnyja abmiežavańni dla impartu z krain, kiraŭnictva ci narod jakich niečym nie dahadzili Kramlu — standartnaja praktyka rasijskich uładaŭ. Znachodžańnie Rasspažyŭnahladam ci inšymi padobnymi strukturami ŭ pradukcyi toj ci inšaj krainy čahości škodnaha amal zaŭsiody dzivosnym čynam supadaje z ahulnym paharšeńniem miždziaržaŭnych adnosin.

Raniej Raśsielhasnahlad zajaviŭ, što z 22 maja ŭvodzić abmiežavańni na ŭvoz kvietak z Armienii.

Kamientary da artykuła