13‑hadovy śpiavak ź Minska ledź nie zahinuŭ, kali kataŭsia na elektrasamakacie

Juny artyst Makar Tarunda trapiŭ u reanimacyju.

Makar Tarunda. Fota ź jaho instahrama

Makar Tarunda — 13‑hadovy śpiavak ź Minska. Jon finalist fiestyvalu «Vialikaja scena», pieramožca konkursu «Chali-Chało-2022», a taksama stypiendyjat śpiecyjalnaha prezidenckaha fondu pa padtrymcy talenavitaj moładzi.

Niadaŭna chłopiec apublikavaŭ u storys zdymak, na jakim jon siadzić u invalidnym vazku. Dobra vidać siniaki na tvary i ruce, adna z ruk zabintavanaja. Padpisaŭ fota jon tak: «Siabry, žyćcio adno. Ja svajo ledź nie straciŭ praz samakat. Bieražycie siabie».

Siabry chłopca pačali repościć jaho fota i dadali padrabiaznaści historyi. Jany raspaviali, što ŭ minułuju piatnicu Makar na vialikaj chutkaści jechaŭ na elektrasamakacie, niečakana naskočyŭ na kamień i ŭpaŭ. U vyniku 13‑hadovy školnik trapiŭ u reanimacyju z razryvam sielazionki i šmatlikimi traŭmami.

Tym časam u Respublikanskim centry dziciačaj niejrachirurhii pryznajuć, što heta vialikaja prablema. Ciapier šmat dziaciej traplajuć da daktaroŭ mienavita praz traŭmy, atrymanyja praz samakaty: abo sami haniali, abo ich źbivali darosłyja samakatčyki.

Tolki za adzin tydzień maja ŭ hety RNPC źviarnułasia bolš za 30 pacyjentaŭ: ź ich 11 byli špitalizavanyja z dastatkova surjoznymi traŭmami (troje trapili ŭ reanimacyju, dvaim zrabili apieracyi).

Kiraŭnik centra, hałoŭny pazaštatny śpiecyjalist dziciačaj niejrachirurhii Ministerstva achovy zdaroŭja Michaił Tałabajeŭ raskazvaŭ, što cikavicca ŭ paciarpiełych pryčynami padzieńnia: «Bolš za pałovu ź ich nie razumiejuć, čamu jany ŭpali. I nie razumiejuć nie tamu, što nie pamiatajuć, stracili prytomnaść, a tamu što jany sapraŭdy nie razumiejuć, na što najechali. Była heta pieraškoda, jamka niejkaja ci niešta jašče — dzicia navat nie zrazumieła».

Jon rastłumačyŭ, u čym zaklučajecca niebiaśpieka katańnia na elektrasamakacie: «Pa-pieršaje, u jaho maleńkija koły. A čym mienšaje koła, tym bolš adčuvalny srodak pierasoŭvańnia da roznych niaroŭnaściaŭ na darozie, a značyć, vyšejšy šaniec zvalicca. Pa-druhoje, vysokaja chutkaść pieramiaščeńnia. Chutkaści 25 kiłamietraŭ za hadzinu bolš čym dastatkova dla atrymańnia surjoznaj traŭmy pry padzieńni ci sutyknieńni».

Tym, chto ŭsio ž nie choča admaŭlacca ad katańnia na elektrasamakacie, doktar raić vykonvać prostyja praviły: vybirać dla katańnia śpiecyjalna adviedzienyja miescy (chacia b tamu, što tam mienšaja vierahodnaść sustreć niejkija pieraškody, niaroŭnaści), nie hrebavać srodkami indyvidualnaj abarony, u tym liku šlemam.

Kamientary da artykuła