«11 tryljonaŭ, bla». Deputat rasijskaj Dziarždumy vyłajaŭsia matam, raskazvajučy pra deficyt biudžetu

Staršynia kamiteta rasijskaj Dziarždumy pa abaronie kankurencyi Valeryj Hartunh, abmiarkoŭvajučy z dumskaj trybuny ŭsio bolšuju dzirku ŭ fiederalnym biudžecie, nie strymaŭsia i vykarystaŭ niecenzurnuju leksiku, piša The Moscow Times.

Valeryj Hartunh

«Nu davajcie pahladzim, što my budziem rabić z deficytam fiederalnaha biudžetu. U nas za minuły hod bolš za 5 tryljonaŭ i zaraz jašče pad 5 tryljonaŭ. Sumarna kala 11 tryljonaŭ užo, bla! Što my z hetym budziem rabić? Drukavać hrošy ci što budziem? Jak u 92‑m hodzie, kali kožny tydzień na 30% ceny raśli», — aburyŭsia parłamientaryj.

Paźniej Hartunh admoviŭsia ad svaich słoŭ, zajaviŭšy, što «nijakaha matu nie było naohuł», i ŭ jaho leksikonie takich vyrazaŭ niama.

Pavodle danych rasijskaha Minfina, za pieršyja čatyry miesiacy 2026 hoda deficyt fiederalnaha biudžetu dasiahnuŭ 5,877 tryljona rasijskich rubloŭ (kala 81,62 miljarda dalaraŭ) — heta ŭ 1,6 raza bolš za hadavy płan (3,786 tryljona rubloŭ — kala 52,58 miljarda dalaraŭ). U Instytucie Hajdara prahnazujuć, što pa vynikach hoda deficyt moža ŭdvaja pieravysić zapłanavany ŭzrovień. 

Niamieckaja raźviedka (BND) raniej zajaŭlała, što faktyčny deficyt biudžetu RF za 2025 hod skłaŭ 8,01 tryljona rasijskich rubloŭ (111,25 miljarda dalaraŭ) zamiest aficyjnych 5,65 tryljona rubloŭ (kala 78,91 miljarda dalaraŭ), i Maskva sprabuje schavać «balučyja straty z dapamohaj prycharošanych ličbaŭ». 

Kamientary da artykuła