Realnaja inflacyja ŭtraja pieravyšaje aficyjna abvieščanuju. A deficyt biudžetu ŭžo vyčarpaŭ płan na ceły hod. Kali b nie apieracyja ZŠA dy Izraila ŭ Iranie, u vyniku jakoj ceny na naftu ŭźvilisia da nieba, Maskva b užo dajadała apošnija reziervy.
Rasija, imavierna, sistematyčna zavyšaje klučavyja ekanamičnyja pakazčyki, kab stvaryć uražańnie ŭstojlivaści pierad sankcyjami i vajennymi vydatkami. Pra heta kiraŭnik vajskovaj raźviedki Šviecyi Tomas Nilsan zajaviŭ u intervju Financial Times.
Pavodle acenak šviedskaha boku, realny ŭzrovień inflacyi ŭ Rasii značna vyšejšy za aficyjny. Kali Centrabank RF havoryć pra 5,86%, to faktyčna jana moža być bližejšaja da ciapierašniaha pamieru staŭki refinansavańnia Banka Rasii — kala 15%.
Akramia taho, u Stakholmie zhodnyja z vysnovami niamieckaj raźviedki BND: Maskva, imavierna, zanižaje i deficyt biudžetu — prykładna na 30 miljardaŭ dalaraŭ. Raniej u Hiermanii zajaŭlali, što ŭ 2025 hodzie realny deficyt užo pieravysiŭ aficyjnyja ličby bolš čym na 2,3 tryljona rasijskich rubloŭ.
Šviedskaja raźviedka taksama źviartaje ŭvahu na šerah finansavych sihnałaŭ, jakija mohuć śviedčyć pra ryzyku budučaha bankaŭskaha kryzisu ŭ Rasii.
Nilsan nie vyklučaje, što rasijski kiraŭnik Uładzimir Pucin moža nie vałodać poŭnaj karcinaj: «Navat z toj skažonaj infarmacyjaj, jakuju jon atrymlivaje, niemahčyma biaskonca ŭciakać ad realnaści».
Pavodle jaho, rasijskaja ekanomika zastajecca ŭraźlivaj, niahledziačy na rost cen na naftu padčas kanfliktaŭ na Blizkim Uschodzie. Kab tolki zakryć biudžetny deficyt, Rasii patrebna, kab nafta Urals trymałasia vyšej za 100 dalaraŭ za baral na praciahu hoda. Dla vyrašeńnia hłybiejšych prablem — značna daŭžej.
Asobna adznačajecca, što madel rostu, zasnavanaja na vajennaj vytvorčaści, nie moža być ustojlivaj. «Heta ŭzbrajeńni, jakija ŭ vyniku źniščajucca na poli boju», — padkreśliŭ Nilsan.
Prablemy ŭžo zakranajuć i vajskova-pramysłovy kompleks. Za vyklučeńniem vytvorčaści dronaŭ, jon zastajecca stratnym, zaležnym ad dziaržaŭnych kredytaŭ i schilnym da karupcyi, ličać u šviedskaj raźviedcy.
U vyniku, jak śćviardžaje Nilsan, Rasija «žyvie ŭ pazyku» i staić pierad dvuma scenarami — praciahły spad abo finansavy šok. U abodvuch vypadkach havorka idzie pra ruch u bok kryzisu.
U Minekanamraźvićcia RF taksama pryznavali: reziervy ekanamičnaha rostu ŭ značnaj stupieni vyčarpanyja, a situacyja stała składaniejšaj praz vysokija staŭki, deficyt pracoŭnaj siły i biudžetnyja abmiežavańni.
Kali b nie apieracyja ZŠA dy Izraila ŭ Iranie, u vyniku jakoj ceny na naftu ŭźvilisia da nieba, Maskva b užo była dajadała apošnija reziervy.
Ciapier čytajuć
Doktarka, jakaja vučyłasia pa metavym nakiravańni, adpracavała paŭtara hoda ź piaci — i pierajechała ŭ Polšču9
Doktarka, jakaja vučyłasia pa metavym nakiravańni, adpracavała paŭtara hoda ź piaci — i pierajechała ŭ Polšču
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4848
Kamientary
kažuć , nie kažuć ? pra heta Utlin i Pryhožyn kazali, pajšli vajnoj na Kreml navat, i tady ich pucin nie pažadaŭ praŭdu pačuć, jak i nikałaška kryvavy ŭ 1917 ci harbačoŭ ŭ 1991