Kałas: Jeŭrasajuz nie moža być pasiarednikam u pieramovach pamiž Ukrainaj i Rasijaj

Viarchoŭnaja pradstaŭnica Jeŭrasajuza pa zamiežnych spravach i palitycy biaśpieki Kaja Kałas padčas pres-kanfierencyi na palach niefarmalnaj sustrečy kiraŭnikoŭ MZS krain-členaŭ Jeŭrasajuza kiprskim Limasole zajaviła, što Jeŭrasajuz nie moža vystupać «niejtralnym pasrednikam» na mahčymych mirnych pierahavorach pamiž Kijevam i Maskvoj, pakolki adkryta padtrymlivaje ŭkraincaŭ i abaraniaje ŭłasnyja intaresy biaśpieki.

Kaja Kałas. Fota: Beata Zawrzel / NurPhoto via Getty Images

Pa słovach dypłamatki, jeŭrapiejski błok pavinien dapamahčy ŭkrainskamu boku ŭ hetych pierahavorach, ale, maŭlaŭ, nie moža być pasiarednikam.

«Tamu što my abaraniajem intaresy Jeŭropy i intaresy Ukrainy. Tamu što Ukraina taksama znachodzicca ŭ Jeŭropie… My nie možam być pasiarednikami, my nie možam być niejtralnymi, staviačysia da ich raŭnapraŭna. My vidavočna na baku Ukrainy», — patłumačyła jana.

Kałas ličyć, što pierahavory pa zaviaršeńni vajny RF suprać Ukrainy pavinny adbyvacca niepasredna pamiž Kijevam i Maskvoj.

«Vielmi važna, kab my zaklikali Ukrainu i Rasiju da dyjałohu, bo isnuje mnostva pytańniaŭ, jakija mohuć vyrašyć tolki jany sami, i nichto inšy. Mahčyma, jość krainy, jakija zajmajucca «čaŭnočnaj dypłamatyjaj», ale ŭrešcie mienavita jany pavinny sieści za stoł pieramoŭ, kab abmierkavać hetyja pytańni, jakija mohuć vyrašyć tolki jany», — skazała dypłamatka.

Raniej čakałasia, što na palach niefarmalnaj sustrečy kiraŭniki MZS krain — členaŭ ES mohuć abmierkavać kandydaturu mahčymaha pradstaŭnika ad błoka na patencyjnych pieramovach pamiž Ukrainaj i RF. Zrešty, Kałas udakładniła, što ŭdzielniki samitu bolš havaryli nie pra kankretnuju kandydaturu, a pra źmiest mahčymych pieramoŭ i ŭmovy patencyjnaha zaviaršeńnia vajny, pieradumovaj jakich pavinna być prypynieńnie ahniu.

«Nie moža być nijakaha jurydyčnaha pryznańnia akupavanych terytoryj Ukrainy, a taksama pavinna być zabiaśpiečana adkaznaść za zroblenaje. Rasija pavinna supracoŭničać ź mižnarodnymi rasśledavańniami i pakryć škodu, pryčynienuju joju. Luboje mirnaje pahadnieńnie pavinna całkam pryznavać suvierenitet, niezaležnaść Ukrainy i jaje prava samastojna vybirać sajuźnikaŭ», — dadała Kaja Kałas.

26 maja ŭ Jeŭrakamisii zajaŭlali, što abiaruć kandydata ad ES na rolu pradstaŭnika dla ŭdziełu ŭ mirnych pierahavorach pa zakančeńni vajny Rasii suprać Ukrainy tolki tady, kali rasijskija ŭłady buduć da ich hatovyja.

Kamientary da artykuła