Va Ukrainie źbirajucca pašyryć mandat śpiecyjalnaha pradstaŭnika pa Biełarusi

Ministr zamiežnych spraŭ Ukrainy Andrej Sibiha padčas «hadziny pytańniaŭ da ŭrada» ŭ Viarchoŭnaj Radzie 29 maja anansavaŭ płany pa pašyreńni mandata śpiecyjalnaha pasła MZS, adkaznaha za supracoŭnictva ź biełaruskimi demakratyčnymi siłami, piša «Interfaks-Ukraina».

Jarasłaŭ Čarnahor

«My płanujem pašyrać mandat, paŭnamoctvy pryznačanaha pasła pa asablivych adnosinach, adkaznaha za kirunak Biełarusi abo kantakty z demakratyčnymi siłami. Tamu my zaraz heta abmiarkoŭvajem. My zrabili pieršy krok pa instytualizacyi i bolš sistemnym padychodzie», — skazaŭ Andrej Sibiha.

Ministr dadaŭ, što MZS, u pryvatnaści, budzie kansultavacca z narodnymi deputatami adnosna taho, jakija śfiery treba dadatkova achapić u miežach paŭnamoctvaŭ novapryznačanaha pasła.

«I abaviazkova heta zrobim u karotkaj pierśpiektyvie», — dadaŭ jon.

Prezident Ukrainy Uładzimir Zielenski jašče ŭ pačatku studzienia zajaviŭ pra namier pryznačyć upaŭnavažanaha pa pytańniach Biełarusi i adznačyŭ nieabchodnaść padtrymki biełaruskich demakratyčnych sił.

15 maja dyrektar Prahramy rasijskich i biełaruskich studyj Rady źniešniaj palityki «Ukrainskaja pryzma», kandydat histaryčnych navuk Jarasłaŭ Čarnahor paviedamiŭ, što pryznačany pasłom pa asobych daručeńniach pa pytańniach demakratyčnych transfarmacyj, uzajemadziejańnia z demakratyčnymi siłami i nacyjanalnymi ruchami niedružalubnych krain. Mienavita jon ciapier adkazny za supracoŭnictva ź biełaruskimi demakratyčnymi siłami.

Kamientary da artykuła