Były dobraachvotnik «Kuś» pahaliŭsia ŭ padtrymku «Łachviča»
Były kalinoviec Alaksandr «Kuś» Kłačko pahaliŭsia. Jon zrabiŭ heta na znak padtrymki dobraachvotnika Alaksandra «Łachviča» Naŭkoviča, jakoha prymusiŭ pahalicca i zapisać prynižalnaje «pakajannaje» videa Radyjon «Hiena» Batulin.
Kłačko kaža na videa, što znachodziačysia va Ukrainie, jon pahaliŭsia, a taksama pahaliŭ vusy.
Jon zrabiŭ heta ŭ padtrymku blizkaha jamu čałavieka, biełaruskaha dziejnaha dobraachvotnika Alaksandra Naŭkoviča z pazyŭnym «Łachvič».
«Bo nie vusy robiać čałavieka hodnym. Ja viedaju dvuch amaralnych bandytaŭ, jakija nosiać vusy: heta Łukašenka i Radyjon Batulin — ukrainski bandyt, jaki dziŭnym čynam apynuŭsia ŭ asiarodździ biełaruskich dobraachvotnikaŭ», — kaža Kłačko.
Jon zapisaŭ zvarot da biełaruskich dziejnych i byłych dobraachvotnikaŭ. «Kuś» kaža, što pavažaje tych, chto pryjšoŭ zmahacca, kab vyzvalić ukrainskuju ziamlu, kab u budučyni Biełaruś zmahła stać volnaj i niezaležnaj krainaj.
«Mianie, vas možna zapałochać, možna pasprabavać i navat maralna złamać. My možam zahinuć pry tych ci inšych abstavinach. Ale nas nielha prymusić pavažać łajno», — havoryć Alaksandr.
«Bo chiba možna pavažać tych, chto abscykaje ludziej? Chto ŭstaŭlaje butelki ŭ dupu? Chto prymusam, zhrajaj prymušaje pahalicca i zbryć vusy? Chto baicca čužoha mierkavańnia, bo kaliści ŭ minułym atrymaŭ maralnuju traŭmu i zaraz takim čynam sprabuje jaje kampiensavać? Nielha», — kaža Kłačko.
Jon prosić pabracimaŭ vyznačycca i adkazać na pytańnie: «ci pavažaju ja bandyta, ci ja za toje, kab jon byŭ pryciahnuty da adkaznaści?»
Razborki ŭ kadyraŭskim styli, kali biełaruskaha dobraachvotnika Łachviča pahalili nałysa i źniali prynižalnaje «pakajannaje» ź im videa, atrymali šyroki rezanans. Paźniej Łachvič paćvierdziŭ, što zapisaŭ «pakajannaje» videa paholenym paśla sustrečy z Rydyjonam Batulinym. Łachvič śćviardžaje, što paśla jany z Batulinym «pacisnuli adzin adnamu ruki i razyšlisia».